Zubikarai nobela beka irabazitako 'Mendiko gaitza', 111 Akademiaren Sariaren finalista
Garderen, Lizarralderen, Alberdiren eta Agirreren sorlanak ere finalisten artean daude. Apirilaren amaieran ezagutaraziko dute irabazlea.
Idoia Garzes, eskuman, Ondarroako Literatur Amuak jaialdian. Idoia Garzes idazle lasartearrak 2020ko 111 Akademiaren Saria jaso dezake Ondarroako XIX. Augustin Zubikarai nobela beka irabazitako Mendiko gaitza (Elkar) lanagatik. 111 Akademiak 2020. urteko 111 Akademiaren Saria erabaki ahal izateko lehenengo bozketa txanda amaitu du, eta bost obra hautatu dituzte bigarren txandan bozkatzeko; horien artean dago Ondarroako Udalak Elkar argitaletxeagaz elkarlanean urtero antolatzen duen nobela bekaren 2019ko lan irabazlea ere.
Garzesen lanagaz batera lehenengo bozketa txandan hautatu dituzten sorlanak honakoak dira: Uxue Alberdiren Dendaostekoak (Susa), Pello Lizarralderen Argiantza (Erein), Joxean Agirreren Nobela errealista bat (Elkar) eta Luis Garderen Aireportuko musika (Alberdania). Horien artetik aterako da, hortaz, 2020an euskal literaturak lagatako libururik gogokoena. “2020. urtean euskal literaturak utzitako uzta zabaletik bost horiek izan dira urteko libururik gogokoena hautatzeko bidean lehenengo bozketa txanda gainditu eta bigarrenera igaro direnak”.
Jakitera eman dutenez, lehenengo txandan 92 akademiakidek eman dute botoa. Orain, akademiakideek martxoaren 26a baino lehen bidali beharko dute bost horietako baten aldeko botoa. Bigarren buelta horretan, bakarren batek jasotako botoen %40 bereganatuko balu, hura izendatuko lukete zuzenean saridun. “Kopuru horretara ailegatzen den lanik ez balego, berriz, bi bozkatuenak finalera pasako lirateke”. Apirilaren amaieran ezagutaraziko dute 2020ko 111 Akademiaren Saria nork eskuratuko duen.
Aurreko urteetan honako literatur lanek jaso dute 111 Akademiaren saria: Karmele Jaioren Aitaren etxea-k (Elkar, Harkaitz Canoren Fakirraren ahotsa-k (Susa), Uxue Alberdiren Jenisjoplin-ek (Susa), Kirmen Uriberen Elkarrekin esnatzeko ordua-k (Susa), Miren Agur Meaberen Kristalezko begi bat-ek (Susa) eta Katixa Agirreren Atertu arte itxaron-ek (Elkar).
