Errietan taldeak 'Begiradak' abestiaren bideoklipa estreinatu du
'Errietan' izeneko estudioko lehen lana datorren astean aurkeztuko dute. Olatz Bailarako Ziñua baserriaren inguruan grabatu dituzte irudiak.
Mutrikuko Errietan musika taldeko kideak. Argazkia: Aritz Larrea/Begipuntuan. Errietan talde mutrikuarrak AME estudioan Axular Arizmendiren gidaritzapean grabatutako Errietan estudioko lehen diskoa aurkeztuko du datorren astean. Eta gaur [apirilak 15] Begiradak izeneko bideoklipa kaleratu dute. Aritz Larrea Agirrezabala (Begipuntuan) argazkilariak grabatu eta editatu duen bideokliparen irudiak Olatz bailarako Ziñua baserriaren inguruetan grabatu dituzte.
Amaia Arantzamendi Mote (ahotsa), Nahia Elesgarai eta Leire Elezgarai (gitarrak), Maitalen Aranberria (baxua), Iera Naberan (bateria), Ainhoa Arreitunandia (teklatua) eta Julen Ruizek (saxofoia eta ahotsa) osatzen dute Errietan taldeko zazpi piezako puzzlea. Pandemia garaian sortu eta hazitako pop eta rock ikutua duten zazpi abestiz jantzi dute euren opera prima.
