Erreferendumaren aldeko sinadura bilketa maiatzera atzeratu dute Ondarroan
Egoera epidemiologikoak hobera egiten duenean iragarriko dute hitzordu berria.
Hamaika Gara ekimenaren baitako erreferendumaren aldeko sinadura bilketa masiboa sustatzen hasiko dira hainbat herritan asteburu honetan. Ondarroan ere, kalera atera eta sinadura batzen hasteko asmoa zuten, baina osasun egoera aintzat hartuta, herri mailako ekintza maiatzera atzeratzea erabaki dute. Egoera epidemiologikoak hobera egiten duenean iragarriko dute hitzordu berria. “Ez dugu data zehatzik ipini, baina ahal dugunean kalean egoteko asmoa daukagu. Jendeak paperean sinatzeko aukera edukitzea ere nahi dugu”.
Adierazi dutenez, urte amaierara arte jarraituko dute estatus politikoari buruzko erreferendumaren aldeko sinadurak batzen. Digitalki Hamaika Gara ekimenaren webgunean sartu eta erreferendumaren aldeko manifestua sinatzeko aukera ere badute herritarrek.
Sinadura bilketari lotutako erronka bat ere bota dute Hamaika Gara ekimenaren eragile sustatzaileek: #11SinadurenErronka. “Izenak berak iradokitzen duen bezala, gutxienez hamaika sinadura lortzeko erronka jarriko diogu jendeari. Sinadura bilketa hau masiboa izan dadin, ahalik eta jende gehien bilakatu beharko da, neurri handiago ala txikiagoan, sinadura biltzaile. Erreferendumaren aldeko manifestua sinatzen duen pertsona oro beste jende batengana ailegatzeko katebegi izatea nahiko genuke”.
