Eremu gorriko herrietako sartu-irteerak debekatu dizkiete kirolari federatuei
Neurri berria zapatutik [apirilak 17] dago indarrean. Lehia ofizialean parte hartzen edo entrenatzen ari diren federatuak dira neurri horretatik salbuetsita geratzen diren bakarrak.
Pandemiaren egungo egoera dela eta, Eusko Jaurlaritzaren Jarduera Fisikoaren eta Kirolaren Zuzendaritzak kirolari federatuen entrenamenduetako mugikortasuna ahalik eta gehien murriztea erabaki du. Bide horretan, aldatu egin ditu Arabako, Bizkaiko eta Gipuzkoako kirolari federatuentzat ezarrita zituen neurriak. Zapatutik [apirilak 17] debekatuta dago eremu gorrian dauden herrietan eta lurraldeetan sartu eta irtetea, egutegi ofizialak baimendutako lehiaketetarako edo entrenamendurako ez bada.
Orain arte hiru lurraldeen arteko mugikortasuna baimentzen zieten federatutako kirolariei, baina aurrerantzean lehia ofizialetan parte hartzen dutenek dute bakarrik aukera hori. Aldaketak edozein kiroletan federatutako herritarrei eragiten die, baita mendizale federatuei ere.
Horrenbestez, lehia ofizialetan parte hartzeko entrenatzen ari diren kirolari federatuek hiru lurraldeetan libre aritzeko aukera daukate. Lehiatzeko prestatzen ari ez diren kirol federatuen mugikortasuna, aldiz, jatorrizko edo helmugako udalerriaren edo lurraldearen intzidentzia tasak markatuko du; izan ere, ezingo da 400dik gorako intzidentzia tasa duten udalerrietatik atera ezta sartu ere. Horiek bizilekua duten udalerriaren eta haren mugakide diren udalerrien artean moldatu beharko dira.
