Netflix Euskaraz taldeak euskalgintzako eragileen babesa jaso du
Apirilaren 15erako 10.000 sinadura lortzeko erronka jo zuten, eta 10.500 lortu dituzte. Netflixi edukiak euskaraz eskatzeko da sinadura bilketak aurrera jarraitzen du: abenduaren 3rako 20.000 lortu nahiko lituzkete.
Euskalgintzako eragileetako ordezkariak, zapatuan, Landakon. Argazkia: Netflix Euskaraz Euskalgintzako, ikus-entzunezkoen sektoreko eta euskal komunikazio esparruko askotariko eragileen babesarekin, agerraldi publikoa egin zuen zapatuan [apirilak 17] Netflix Euskaraz herritar taldeak, Durangoko Landakon.
Izaskun Rekalde Netflix Euskaraz taldeko kideak ondokoa esan zuen: “Azkeneko urteotan, asko aldatu dira ikus-entzunezkoen kontsumo ohiturak. Telebista tradizionalaren kontsumoa asko jaisten ari dela erakusten dute datuek. Aldiz, ordainpeko plataformen harpidetzak %40 hazi dira azken bost urteotan, eta euskaldunon hamarretik seik edaten dugu iturri horretatik. Horien artean, Netflix da merkatu kuotarik handiena duena. Plataforma horietan, ez dago ia euskarazko edukien eskaintzarik. Netflixen, adibidez, 3.500 film baino gehiagoko katalogotik lau film baino ez ditugu euskaraz, eta telesailik ez dago bat bera ere”. Hala, herri mugimenduak euskararen larrialdiaz ohartarazi nahi zuen: “Euskarak bizi nahi badu, ikus-entzunezkoen alorrean ere egun daukan baino presentzia handiagoa eduki behar du”.
“Ikus-entzunezkoen gaia, herri gisa, euskarari bide eman nahi badiogu, estrategikoa da, eta eztabaidaren erdigunera ekartzea izan da gure asmoa”
Durangoko agerraldian agerian geratu zen taldea jasotzen ari den babesa eta sinadura bilketak izan duen oihartzuna. Ondoko taldeek eman zieten babesa zapatuko agerraldian: Euskalgintzaren Kontseilua, Topagunea, Uema, Disney Euskaraz, Tinko euskara elkartea, Ibaia (Ikus-entzunezkoen Euskal Ekoizle Burujabeen Elkartea), Napar (Nafarroako ekoizleen elkartea), Hekimen euskal hedabideen elkartea, Euskal Hedabideen Behategia, Udako Euskal Unibertsitatea, Euskal Herrian Euskaraz, Bieuse bikoiztaile euskaldunen elkartea, AEK, Game Erauntsia eta Euskal Encondings webgunea.
Rekaldek gaineratu zuen gaur egun, batez beste, egunean hiru-lau ordu ematen ditugula pantailen aurrean. “Horrek eragin zuzena dauka gure hizkuntza ohituretan eta errealitatea ulertzeko moduan. Badakigu ikus-entzunezkoen gaia, herri gisa, euskarari bide eman nahi badiogu, estrategikoa dela, eta eztabaidaren erdigunera ekartzea izan da gure asmoa, eta neurri batean lortu dugu. Kanpotik datorkigun kultura uholde honen aurrean, euskaldunon kontzientziak astintzeko eta ahalduntzeko momentua dela deritzogu”.
Disney Euskaraz eta Twitz. Netflix Euskaraz taldekoak ez dira bakarrak. Disney Euskaraz taldeak ia 6.000 sinadura bildu ditu Disney Plus plataforman edukiak euskaraz eskatzeko. Halaber, 3.000 Twitz egitasmoak 4.000 sinadura inguru bildu ditu.
Netflix Euskaraz taldearen aldarrikapenak, gainera, une garrantzitsu batean iritsi dira. Bi arrazoirengatik, Rekaldek azaldu moduan: “Batetik, plataformek indar handia hartu dutelako, eta itsaso gero eta zabalago horretan euskararen presentzia gero eta txikiagoa delako. Bestetik, Espainiako Ikus-entzunezko Lege Orokor berria tramitatzen ari direlako, eta aukera ikusten dugulako gure indarrarekin lege horretan eragiteko. Plataforma horien jarduera arautu behar da, euskarazko eskaintza izan dezagun”.
AEBetako plataforma erraldoiari gogoratu diote bere balioetan ondokoa jasotzen duela: “Jatorri, kultura eta ikuspegi desberdinetako pertsonak barne hartzea”.
Hartaz, eskaera hau egin nahi dio herri mugimenduak Netflix plataformari: “Tokian tokiko komunitateekin betebeharrak ere badituela gogorarazi nahi diogu. Euskara, eta plataforma honen kontsumitzaile potentzial garen hemengo eta hango 800.000 euskal hiztunen beharrizanak ase ditzala. Euskal hiztunok plataformako ikus-entzunezko eduki guztiak euskaraz jaso nahi ditugu. Netflixek antzeko kasuetan esan izan du benetan eskaria balego eskainiko lituzkeela edukiak hizkuntza gutxituan. Hemen dituzu 10.500 sinadura, eta gehiago etorriko dira; eskaria badago”. AEBetako plataforma erraldoiari gogoratu diote bere balioetan ondokoa jasotzen duela: “Jatorri, kultura eta ikuspegi desberdinetako pertsonak barne hartzea”.
Bi hilabeteko epean 10.500 sinadura bildu eta gero, taldearen bidea ez dela amaitu ohartarazi zuten. Batetik, sinadura bilketak aurrera jarraituko du, abenduaren 3ra arte, Euskararen Egunera arte. Helburua 20.000 sinadura lortzea da. “Bestetik, gure ekimena mugatua da, behar zabalago baten isla, eta aurrerantzean bidea ez dugu bakarrik egingo”, adierazi du Rekaldek. “Gaiari behingoz sendo helduko dion nazio mailako herritar mugimendu bat behar dugu. Berandu baino lehen elkartu gaitezen ikus-entzunezkoen arloko Euskal Herri osoko eragileak”.
