Ondarroako eta Mutrikuko hiru kirolari ariko dira II. Binakako Euskal Pentatloian
Aratz Mugertza mutrikuarrak bigarrenez parte hartuko du lehian. Inhar Urruzunok eta Mikel Agirrek, ostera, lehen aldiz parte hartuko dute herri kirolen proba konbinatuan. Kanporaketa maiatzaren 22an jokatuko da Tolosan.
Binakako Euskal Pentatloiko parte hartzaileen talde argazkia. Argazkia: Tolosaldeko Ataria. Maiatzaren 22an hasita Binakako Euskal Pentatloia jokatuko da bigarrenez. Zapatuan [apirilak 17] Tolosako zezen plazan elkartu ziren txapelketan parte hartuko duten bikoteak. Gizonezkoetan hamabi bikotek parte hartuko dute, eta horien artean Ondarroako eta Mutrikuko hiru kirolari daude: Inhar Urruzuno eta Mikel Agirre ondarrutarrak eta Aratz Mugertza mutrikuarra.
Aratz Mugertza mutrikuarrak bigarrenez parte hartuko du lehian, eta Iñaki Errazkin tolosarrarekin osatuko du bikotea. Inhar Urruzunok eta Mikel Agirrek, ostera, lehen aldiz parte hartuko dute herri kirolen proba konbinatuan. Aitzol Atutxa dimoztarrarekin batera osatuko du bikotea Urruzunok, eta Ousmane Drame barakaldarrarekin ariko da Agirre.
Gizonezkoen txapelketari dagokionez, kanporaketa maiatzaren 22an jokatuko dute Tolosako zezen plazan, eta bertatik sei bikote sailkatuko dira finalerako. Ekainaren 20an leku berean jokatuko dira gizonezkoen eta emakumezkoen finala. Estreinako egingo dute emakumezko txapelketa, eta bertan hiru bikotek neurtuko dituzte indarrak.
Hona hemen Binakako Euskal Pentatloia jokatuko duten parte hartzaileen zerrenda:
Gizonezkoak:
- Aratz Mugertza eta Iñaki Errazkin.
- Mikel Agirre eta Ousmane Drame.
- Inhar Urruzuno eta Aitzol Atutxa.
- Andoni Iruretagoiean Izeta VI.a eta Jexuxmari Iruretagoiena Izeta III.a.
- Beñat Amade eta Aritz Irazabal.
- Jagoba Otaegi eta Luis Txapartegi.
- Kepa Peñagarikano eta Gorka Etxeberria.
- Daniel España eta Julio Jimenez.
- Jon Unanue Goenatxo III.a eta Mikel Larrañaga.
- Jon Gisasola Zelai V.a eta Ioritz Gisasola Zelai IV.a.
- Xabier Urrutia eta Julen Kañamares
- Joxe Martin Bustinza eta Jokin Eizmendi.
Emakumezkoak:
- Uxue Ansorregi eta Karmele Gisasola Zelai III.a.
- Garazi Arruti eta Lucia Orbe.
- Claudia Lucia Muñoz eta Julia Martinez.
