25 bat herritar batu dira Ondarroako naturguneak garbitzeko ekintzan
Boluntarioek 30 poltsa baino gehiago bete dituzte. Espazio natural eta publikoetatik, batez ere, kartoizko ontziak, plastikozko botilak eta latak jaso dituzte. Zigarro punten kopurua ere azpimarratzekoa dela esan dute.
Auzolanean batu ziren herritarrak, Alamedan batuta. Argazkia: Ondarroako Udala. Ondarroako Udalaren ekimenez, herriko naturguneak eta txoko ezberdinak garbitzeko auzolana egin zen domekan [ekainak 13]. Udalak emandako datuen arabera, taldeka banatuta 25 boluntario inguru ibili ziren mendibideak, Alleri aldea eta Zubi Zahar herri ikastolako atzeko eta erreka ondoko gunea garbitzen. Gutxi gorabehera, bi bat orduz aritu ziren garbitzen eta esan dutenez, 30 poltsa baino gehiago bete zituzten; batutako guztia Alamedan jarri zuten denen bisitara, herritarrak kontzientziatzeko. “Bertaratutakoek hondakin asko batu zituzten. Tartean pisu asko zuten poltsak batu zituzten; mugitu ezin izan zituztenak inguruko edukiontzietara bota zituzten”.
Zehaztu dutenez, zaborrik gehien erreka inguruan batu zuten. “Ikastola atzetik hasi eta Zaldupen pasealekua hasten den tokira bitarten, zabor asko batu zuten. Horrek guztiak batu izan ez balira, uretan amaituko lukete, horrek dakarren ondorio guztiekin”.
Auzolanean batutako zenbait boluntario, Zaldupe atzeko gunean. Argazkia: Ondarroako Udala.
Espazio natural eta publikoetatik, batez ere, kartoizko ontziak, plastikozko botilak eta latak jaso zituzten. Batutako zigarro punten kopurua ere azpimarratzekoa izan zen. “Ez da ezer kostatzen zigarroa erre ondoren itzali eta zaborrontzira botatzea. Lurrean amaitzen duten zigarro punta horietako asko eta askok herriko estolderian edo Artibai ibaian amaitzen du, eta hortik zuzenean itsasora doaz guztiak. Gure ardura da hondakinak edukiontzietara botatzea eta ingurua zaintzea”.
Udalaren ekimenez egindako mota horretako lehenenengo auzolana izan da. Nabarmendu dutenez, esperientzia “polita” izan da; balorazio oso ona eta positiboa egin dute. “Udalak antolaten duen halako lehenengo ekimena izan da, eta erantzuna ikusita, halako ekintza gehiago antolatzeko asmoa daukagu. Udalak eskerrak eman nahi die ekintzan parte hartu zuten herritarrei”.
