Mutrikun grabatutako disko bat, MIN sarietako finalista
Sonakay taldeak AME estudioetan grabatutako 'Sonakay guztiekin' lana Espainiako musika independientearen sarietako finalista izan da. Dena ondarrutarrek eta Ibai Marin donostiarrak Mutrikun grabatutako lanak ere aurkeztu dira sariketara.
Axular Arizmendi AME estudioko arduraduna (erdian), Sonakay taldeko kideekin batera. Argazkia: Sonakay Mutrikuko AME estudioetan 2019an grabatutako Sonakay guztiekin lana XIII. MIN Espainiako musika independientearen sarietako izendatuen artean egon da. Euskal-flamenko fusioa egiten duen Sonakay talde donostiarrak 2020an kaleratutako lana, zehazki, flamenko disko onenaren atalean bost finalisten artean geratu da; Astola y raton taldearen Rock de palo lanak lortu du garaikurra.
Garaikurrik irabazteko aukerarik eduki ez badute ere, Axular Arizmendi AME estudioko arduraduna pozik geratu da. “Diskoa hemen grabatzeaz gain, ekoizpenean ere parte hartu nuen eta nahasketak ere neuk egin nituen. Nire estudioan grabatu diren lan guztietatik MIN sarietako finalera ailegatu den lehendabiziko lana da. Sariak Espainia mailan egiten diren garrantzitsuenak dira eta halako oihartzuna lortzea, pozgarria da”.
Axular Arizmendi (ezkerrean) eta Sonakay taldeko kide batzuk, MIN sarietako alfonbra gorrian. Argazkia: Axular Arizmendi.
AME estudioetan grabatutako beste bi lanek ere parte hartu dute MIN sarietarako kanporaketa fasean. Dena hirukote ondarrutarrak 2020an kaleratu zuen Ezer sentitzeko debut lanak eta Ibai Marin artista donostiarrak 2021n aurkeztutako Desde lo salvaje lanak hainbat ataletara aurkeztu zuten hautagaitza. “Ibai Marinen lana lehen kanporaketan kalean geratu zen eta Denaren lana euskaraz egindako disko onenen atalean bigarren faserako sailkatu bazen ere, ez zuen azken faserako txartelik lortzeko aukerarik eduki”.
