Zabalik dago Ondarroako Beldur Barik lehiaketara lanak aurkezteko epea
Lanak aurkezteko azken eguna azaroaren 5a da. Kategoria bakoitzeko proiektu irabazleak 300 euro irabazteko aukera edukiko du.
Abian da gazteen artean errespetua, berdintasuna eta indarkeria sexistaren prebentziorako jarrerak sustatu nahi dituen Beldur Barik lehiaketa. Ondarroan, ohikoa den modura, tokian tokiko lehiaketa ere antolatu dute, eta parte hartzeko epea zabalik dago. Lanak aurkezteko azken eguna azaroaren 5a da. Proiektuak, zehazki, 23:59 aurretik bidali beharko dira etxelila@ondarroa.eus edo rbaltar@ondarroa.eus posta elektronikoetara. “Lan guztiak bideo formatuan aurkeztu beharko dira. Bideoak YouTube edo Vimeo plataformetara igo beharko dira, aukera publikoan, eta gero horren lotura bidali beharko da, webgunean dagoen inprimakiagaz batera”.
Lehiaketa 12 eta 26 urte bitarteko gazteei zuzendua dago, eta adierazpen artistikoak saritzen ditu. “Bideoek, gehienez, 3 minutuko luzera eduki beharko dute, kredituak barne. Edozein adierazpen artistiko onartuko da, baldin eta ikus-entzunezko euskarrian aurkezten bada: flashmobak, errezitatuko poemak, bideoklipak, argazkiak, fotomuntaketak, fotonobelak, lipdubak, dantzak, film laburrak, animaziozko proiektuak, proiektuen edota artelanen aurkezpenak, performanceak, herritarren esku hartzeak…”.
[IRAKURRI HEMEN LEHIAKETAREN OINARRIAK]
Bakarka edo taldeka parte hartu daiteke, eta lanak ezinbestean euskaraz aurkeztu beharko dira, azpitituluak barne. “Pertsona eta talde bakoitzak, gehienez, hiru proiektu aurkez ditzake”. Antoltzaileek azpimarratu dutenez, proiektu parte hartzaileek Beldur Barik jarrera islatu behar dute. “Kalitate teknikoaren edo artiskoaren gainetik, mezuaren kalitatea baloratuko da. Hau da, indarkeria matxistaren adierazpen mota guztiak gainditzeko eta harreman askeak, errespetuzkoak, parekideak, anitzak eta ez-sexistak eraikitzeko konpromiso pertsonal eta kolektiboa erakutsi beharko dute”.
Parte hartzaileei dagokienez, hiru kategoriatan banatuta parte hartuko dute. Honakoetan:
- Lehen kategoria: 2008an eta 2009an jaiotakoak.
- Bigarren kategoria: 2003 eta 2007 bitartean jaiotakoak.
- Hirugarren kategoria: 1995 eta 2002 bitartean jaiotakoak.
Antolatzaileek zehaztu dutenez, aurten kategoria bakoitzeko sari bakarra banatuko da. Kategoria bakoitzeko onenek 300 euroko sari bana irabazteko aukera edukiko dute. Etxelilan azaroaren 19an egingo duten ekitaldian banatuko dituzte sariak.
