Udako TAO sistema baloratzeko inkesta zabaldu du Mutrikuko Udalak
Herritarrek eta kanpotarrek TAO sistemarekin eduki duten esperientzia lehen eskutik ezagutu nahi du udalak.
TAO sistema Mutrikuko herrigune guztira zabalduta egon den lehenengo udararen ostean, herritarren eta erabiltzaileen gogobetetze mailaren eta horiek dituzten kezken eta beharren berri edukitzeko eta iritziak eta ekarpenak kontuan hartzeko inkesta bat egitea erabaki du udalak.
Zehaztu dutenez, balorazioa egin eta iritziak jasotzeko lehenengo pausoa da inkesta. “Mahai politikoan egin dugun lanketan arazo batzuk identifikatuta ditugu, baina beste batzuk jakin nahi ditugu sistema erabili duten horien aldetik. Jasoko ditugun iritzi eta datu horiek guztiak mahai gainean jarri eta hurrengo udarako lanketa egiterako orduan, hobekuntzak eta aldaketak egiteko edo sistema birpentsatzeko balioko digu. Gure asmoa da ahalik eta jende gehiena gustura egotea sistemarekin”.
Inkesta erantzuteko azken eguna azaroaren 9a da. TAO sistema hobetzeko herritarren eta erabiltzaileen parte hartzea ezinbestekoa dela esan dute
TAO sistemaren prezioei, guneei, makinei… buruzko iritzia jasotzeko ia 40 galderako inkesta prestatu dute. Sistema hobetzeko herritarren eta erabiltzaileen parte hartzea ezinbestekoa dela esan dute, eta azpimarratu dute ahalik eta erabiltzaile gehienen iritzia ezagutu nahi dutela “emaitza erreal eta onena” lortzeko. “Galdetegia nahikoa luzea da, baina hortik datu asko jasoko ditugu. Modu horretara, ahalik eta ñabardura gehienari irtenbidea emateko aukera edukiko dugu”.
Bi inkesta mota prestatu dituzte: bata, Mutrikun bizi direnentzat edo Mutrikun bigarren etxebizitza bat dutenentzat eta, bestea, Mutrikun bizi ez direnentzat edo Mutrikun bigarren bizileku bat ez dutenentzat. “Azkenean, herrian bizi den batek edo kanpotik egun pasa edo lantokira datorrenak TAO sisteman sumatu dituen arazoak ez dira berdinak izango. Profil ezberdin horiek kontuan hartuta galdera ezberdinak prestatu ditugu”. Inkesta horietako bakoitza euskaraz zein gazteleraz erantzuteko aukera dago; azaroaren 9a da inkesta erantzuteko azken eguna.
Galdetegia paperean erantzuteko aukera ere zabaldu dute, ahalik eta erabiltzaile gehienek parte hartzeko aukera eduki dezaten. Inprimakiak udaletxeko sarreran eta Turismo Bulegoan daude eskuragarri. Betetako galdetegiak bi toki horietan ipinitako buzoietan jasoko dituzte. “Dena errazte aldera, ahalik eta jende gehienak inkesta Internet bidez erantzutea eskatzen dugu. Bestelakoan datuak batu eta aztertzeko lana gehiegi luzatuko zaigu. Hala ere, inkesta paperean betetzeko aukera jarri dugu inor ez geratzeko erantzun gabe”.
Inkesta erantzun:
- Mutrikun bizi direnei edo Mutrikun bigarren etxebizitza bat duten pertsonei zuzendutako inkesta: https://forms.gle/wWSQtZAfy46EsNsZ6
-
Mutrikun bizi ez direnei edo Mutrikun bigarren etxebizitzarik ez dutenei zuzendutako inkesta: https://forms.gle/WsMt15hepj6pjv118
