Geoparkearen Karst jaialdiak espeleologiari buruzko hitzaldi sorta dakar Mutrikura
Zabiel kultur etxean egingo dute zortzi hitzaldi motzez osatutako jardunaldia. Parte hartuko duten adituen artean Mutrikuko Burumendi Espeologia taldeko bi kidek parte hartuko dute.
Geoparkearen Karst jaialdiaren aurkezpena. Argazkia: Euskal Kostaldearen Geoparkea. Aurten, Karst and Caves nazioarteko urtea dela eta, Euskal Kostaldeko Geoparkeak Karts jaialdia: harria eta herria ekitaldia antolatu du. Ekitaldi horren barruan, espeleologiari buruzko jardunaldiak egingo dituzte Mutrikun. Zortzi hitzaldi motzez osatutako hitzaldi sorta eskainiko dute barikuan [azaroak 5] Zabiel kultur etxean. Hitzaldiak euskaraz zein gazteleraz izango dira eta espeleogia eta lur azpiko mundu ezezagunean interesa duten guztiak gonbidatu dituzte.
Mutrikun egingo duten jardunaldiak bi zati edukiko ditu. Kobak: Geoparkearen bihotza zatiaren barruan ordu laurdeneko sei hitzaldi eman eta Geoparkearen espeleologiarako lankidetza ildoei eta etorkizuneko erronkei buruz eztabaidatuko dute. Atsedenaldiaren ostean, Lur azpiko erraldoiak gaiari ekingo diote. Euskal Pirineoetan eta Europako mendietan egin diren espeleologia kanpainei buruzko ordu erdiko bi ponentzia emango dituzte horretan ari diren bi adituak.
Jardunaldian parte hartuko duten adituen artean Mutrikuko Burumendi Espeologia taldeko bi kidek parte hartuko dute. Josu Zeberiok Larra kanpainari buruzko xehetasunak emango ditu. Nerea Arrizabalagak, aldiz, taldearen ibilbidearen berri emango du. “Azken hiru urteotan egin dugun lan zientifikoari buruzko xehetasunak emango ditut; besteak beste, esploratzen, katalogatzen eta prospektatzen egiten ari garen lana azalduko dut. Ditugun helburuen berri eta kobetan zertan ari garen ere kontatuko dut. Herri mailan egin ditugun ekintzen berri ere emango dut. Udan, esaterako, 200 ume baino gehiago eraman ditugu espeleologia egitera”.
Karts jaialdia: harria eta herria jaialdiko ekitaldi nagusia, berriz, zapatuan [azaroak 6] egingo dute Debako Zumardian. Hitzaldiak, harri jasotzaile eta zulatzaileen erakustaldia, Merkatu Txikia, bi irteera gidatu eta bestelako jarduerak antolatu dituzte.
ESPELEOLOGIA JARDUNALDIAK. EGITARAUA:
- Kobak: Geoparkearen bihotza
- 17:00. Espeleogenesis de las cuevas del Geoparque de la Costa Vasca. Hizlaria: Martin Arriolabengoa (EHU).
- 17:15. Exploraciones a cargo del GERS AEM de Barcelona y de CEV en los ultimos 40 años en el macizo de Izarraitz. Hizlaria: Ignasi de Izagirre i Maura (GERS).
- 17:30. Arnoko karsta. Txikienetik handienera. Hizlaria: Nerea Arrizabalaga Lezertua (Burumendi Espeleologia Taldea).
- 17:45. El sistema Ermitia-Aixa-Ibarrengo: estado actual de las exploraciones. Hizlaria: Candido Ugarte (Felix Ugarte Elkartea).
- 18:00. El monticulo de Aizkoitxo. Hizlaria: Evaristo Rodriguez Rabano (Morkaikoko Leizarpe Espeleologia Taldea).
- 18:15. Mapa unificado de las cuevas del Geoparque Mundial de la Unesco de Montañas do Courel. Hizlaria: Daniel Ballesteros (Geoparque Mundial de la Unesco Montañas do Courel).
- 18:30-19:00. Geoparkeko espeleologiarako lankidetza ildoei eta etorkizuneko erroneki buruzko galderen eta eztabaiden txanda.
- Lur azpiko erraldoiak
- 19:30. Euskal Pirinioak 1.000 metroko sakoneran esploratzen. Hizlaria: Josu Zeberio (Larra 2021 Espeleologia kanpainako koordinatzailea eta Burumendi Espeleologia Taldeko kidea).
- 20:00. Espeleologia y ciencia en lo mas profundo de los Picos de Europa. Hizlaria: Daniel Ballesteros (Geoparque Mundial de la Unesco Montañas do Courel).
