5-11 urte arteko haurren txertaketa onetsi du Espainiako Osasun Publikoko Batzordeak
Hilaren 15etik aurrera autonomia erkidegoek haurrak txertatzen hasi ahal izango dutela jakinarazi du.
Sendagaien Europako Batzordeak oniritzia eman zion Pfizer botika etxeak haurrentzat ondu duen COVID-19aren aurkako txertoari, eta 5-11 urte arteko umeei txerto hori jartzeko bidea ireki du orain Espainiako Osasun Publikoko Batzordeak. Adierazi du lehen txertoak hilaren 13an helduko direla, eta hilaren 15ean hasi ahal izango dutela autonomia erkidegoek umeak txertatzen. Urtarrila bitartean 3,2 milioi dosi jasotzea espero dutela esan dute, eta horiekin 5-11 urte arteko ume guztiei lehen dosia jartzeko era izango dela.
Araban, Bizkaian eta Gipuzkoan hilaren 15ean bertan hasi nahi dute umeen txertaketa, Eusko Jaurlaritzako Osasun sailburu Gotzone Sagarduik gaurko gobernu kontseiluaren osteko agerraldian esan duenez: “Osakidetza horretarako prest dago, eta hasteko eguna eta Euskadin edukiko duen dosi kopurua —oraindik ez digute jakinarazi zehazki zenbat izango diren— zein den jakinda, txertaketa prozesuan informazioa emango diegu pertsona horiei datozen egunetan”. Zehaztu duenez, 11 urtekoekin hasiko dira, eta horiek txertatu ahala, gazteagoekin jarraituko dute.
