Gipuzkoako zahar etxeetako egoera "jasanezina" dela salatzeko grebara deitu du LABek

Barikurako [abenduak 17] iragarri dute lanuztea. Besteak beste, Maite Peña Gizarte Politiketako diputatuari bilera eskaera egingo diote.

Nerea Bedialauneta Alkorta

Mutriku

2021/12/15

Gipuzkoako zaharren egoitzetako langileen egoerak ez duela hobera egin dio LAB sindikatuak. Egoera “jasanezina” dela eta “berandu baino lehen urgentziazko irtenbide bat bilatzea ezinbestekoa” dela iritzita, beste greba egun bat deitu du barikurako [abenduak 17]. 09:30ean piketea egingo dute Gipuzkoako Foru Aldundiaren Gizarte Politiketako egoitzaren aurrean; sindikatuak iragarri duenez, Maite Peña Gizarte Politiketako diputatuari bilera eskaera egingo diote. 11:00etan, berriz, elkarretaratzea egingo dute aldundiak Donostiako Gipuzkoa plazan duen egoitzaren aurrean.

Aldundiak langileekin batzeko eta “muturrekoa” bihurtu den egoerari irtenbidea emateko “borondaterik ez” duela salatu du sindikatuak. Adierazi dute urriaren 28an burutu zuten greba egunean bilera eskaera formal eta publikoa egin ziotela diputatuari, “helduen egoitzetako egoeraz hitz egin eta irtenbideak bilatzen hasteko asmoz”. Eta azaroaren 12an, “erantzunik jaso ez” zutenez, beste greba egun bat gauzatu zuen LABek, baina aldundiko ateak “muturren aurrean itxi” zizkietela salatu dute. “Egun hartan, hitzordu bat emateko konpromisoa hartu zuen Maite Peñak, baina gaur gaurkoz ez da sektoreko langileokin harremanetan jarri”.

Egoitzetako lan gatazkak Gipuzkoako jendarte osoari eragiten diola azpimarratu dute

Dena den, ez dutela “gelditzeko inolako asmorik” adierazi dute. “Presio sozial eta sindikala biderkatzeko momentua da, COVID-19aren pandemiari aurre egin dioten emakume langileek merezi dutelako, gure aiton-amonek merezi dutelako eta Gipuzkoako jendarteak merezi duelako. Aldundiarekin eseri eta negoziazio kolektiboa martxan jarri arte honek ez du etenik izango. Ratioak handitu behar dira eta herrialdeko hitzarmena behar dugu; zaintza lanak aitortu eta zerbitzua duindu behar da”.

Egoitzetan bizi duten egoera zaintza lenen merkantilizazioaren, lan prekarietatearen eta emakume langileen lanaren “debaluazioaren ondorio estrukturala” direla diote. “Elkartasun osoa adierazi nahi diegu atzo greba eguna izan zuten Bizkaiako zahar etxeetako langileei; haien borroka gurea egiten dugu. Egoera hau ez da Txara Ieko, Gipuzkoako zahar etxeetako ezta Bizkaiko helduen egoitzetako arazo bat. Zaintza negozio bihurtu nahi dute eta diru publikoz finantzatutako zerbitzu publikoak kudeatzen dituzten enpresa pribatuek izugarrizko irabazi ekonomikoak izaten ari dira gure aiton-amonen zainketa lanaz eta helduen egoitzetako langileen esplotazioaz baliatuz”.

Egoitzetako lan gatazkak Gipuzkoako jendarte osoari eragiten dion “auzi soziala” dela azpimarratu dute. “Hau ez da langileon eta patronalaren arteko lan gatazka soil bat. Guztion eskubidea da kalitatezko zaintza zerbitzuak jaso edota zaintzak lanak baldintzarik duinenetan eskaintzea”.