Ondarroako Udalak harrera egin die Saharako ordezkariei
Abba El-Haissan eta Limam Mohamed saharar ekintzaileak pozik agertu dira udabaltzan egiten dieten harreragatik. Ondarroako txokoak ezagutzeko aukera ere eduki dute.
Abba El-Haissan saharar ekintzailea eta CONASADHko (Giza Eskubideen Batzorde Saharaui Nazionala) presidentea Ondarroan egon zen martitzenean [abenduak 14]. Mendebaldeko Saharan ematen diren giza eskubideen urraketei buruzko hitzaldi bat ematera etorri zen Kofradia Zaharrera, Limam Mohamed Euskadirako Saharar ordezkaritzako kideak eta Euskal Fondoko ordezkari bategaz lagunduta, eta hori baliatuta, harrera egin zieten Zunbeltz Bedialauneta Ibaibarriaga alkateak eta udalean ordezkaritza duten bi indar politikoetako ordezkariek. Udalbatza aretoan egindako ekitaldi xumean aniztasun teknikariak eta Yaalah elkartekoek ere parte hartu zuten.
Alkateak ekintzaile sahararrei eskerrak eman zien herrira etorri izanagatik. Txalupa bat ere eman zien oroigarri legez, eta bisitariek eskertuta jaso zuten; pozik agertu ziren baita ere egin zieten harreragatik. Luze berba egiteko aukera ere eduki zuten. Abba El-Haissanek Mendebaldeko Sahararen egoeraren berri eman zuen. Udal ordezkarien eskutik, bestalde, Ondarroak Saharar herriagaz “zer inplikazio maila daukan eta zer asmo dituen” lehen eskutik ezagutzeko aukera eduki zuten.
Abba El-Haissan eta Limam Mohamed saharar ekintzaileak, Ondarroako udal ordezkariekin batera. Argazkia: Ondarroako Udala.
Aldi berean, Yaalah elkarteak egindako ibilbidea ere errepasatu zuten. “Besteak beste, Saharatik udan umeak ekarri ahal izateko Ondarroako Zaldupe Eskolan eskualde mailako aterpetxe bat ipintzeko asmoa dagoela azaldu zieten, baina koronabirusa dela eta, hori dena geratuta dagoela. Horrez gain, Oporrak Bakean egitasmoaren barruan Ondarroara etortzen diren umeek zelako giroan bizi diren eta zer ekintza egiten dituzten ere azaldu zieten”.
Harreraren ostean, udal ordezkarien eta Yaalahko ordezkarien eskutik, herria ezagutzeko aukera eduki zuten. “Hitzaldia eman aurretik herriko hainbat txoko bisitatu zituzten eta, aldi berean, ondarrutarren izaeragaz zipriztintzeko aukera eduki zuten”.
Sahar ekintzaileei Ondarroako udalbatzan egindako harrera. Argazkia: Ondarroa Udala.
Saharar ekintzaileak Ondarroako Zubi Zaharrean. Argazkia: Ondarroako Udala.
