Debegesak atzerrian bizi diren zientzialariei bueltatzen laguntzeko programa bat abiarazi du
Proiektuan parte hartzeko Debegesaren webgunean dagoen formulario bat bete behar da; Debabarrenan bizi direnek izango dute lehentasuna programan.
Debegesak Hator! izeneko egitasmoa abiarazi du atzerrian bizi diren kualifikazio tekniko edo teknologiko altuko gazteen itzultzera errazteko. “Programa nagusiki, ingeniaritza, matematika, telekomunikazioa, kimika, informatika eta fisika alorretan ikasketak dituztenei dago zuzenduta. Hala ere, beste diziplina batzuk ere baloratuko dira”. Proiektuan parte hartzeko Debegesaren webgunean dagoen formulario bat bete behar da. “Debegesa jarriko da interesatuekin harremanetan”. Azpimarratu dute Debabarrenan bizi direnek izango dute lehentasuna programan.
Mentoring eta akonpanaimendu prozesu baten bidez gauzatuko dute programa. Prozesu horretan enpresen zuzendaritzarekin eta gerentziarekin harremanetan jarriko dituzte, itzulera ibilbidean orientatzeko. “Atzerrian bizi diren gazte horiek gaur egun ez dute informaziorik beren sektore profesionalari buruz gure herrialdean, eta askok ez dakite nondik hasi beren gaitasun profesionalak hemen garatzen jarraitu ahal izateko eta kalitatezko enplegua bilatzeko. Hain zuzen ere, Hator! programak hori landu nahi du”.
Azken fasean enpresa batekin elkar ezagutzeko elkarrizketa baterako hitzordua finkatuko da
Programa hiru fasetan banatuta gauzatuko dute. Lehenengo fasean programaren berri emango diete parte hartzaileei eta elkarrizketa bat egingo diete pertsonaren egoera, profila eta interesak ezagutzeko. “Parte hartzaile bat Hator! programan sartzen denean tutoretza, akonpainamendu eta orientazio prozesua hasten da; bere laneko profila, gaitasunak eta helburu profesionala aztertzen dira eta curriculuma lantzen da”.
Bigarren fasean, lan merkatuan sartzeko prestakuntzarekin hasiko dira; enpresen mapa landuko dutela esan dute.”Beren profil eta interesekin bat datozen enpresak eta bestelako entitateak identifikatzen dira eta eskatzen dituzten konpetentziak aztertzen dira”.
Azken fasean, aldiz, enpresa mapako enpresa bat aukeratu eta elkar ezagutzeko elkarrizketa baterako hitzordua finkatuko da. “Elkar ezagutzeaz gain, helburua da pertsonak itzulerako Ekintza Plana diseinatzea elkarrizketan tratatutako guztiarekin. Debegesa arduratuko da enpresa horietako batekin elkarrizketa egiteko hitzordua finkatzeaz eta pertsona topaketa horretaz prestatzeaz”.
