Ondarroako Zatoztek 2.100 euro zozkatuko ditu bezeroen artean
Elkarteko dendetan urtarrilaren 5era arte erosketak egiten dituztenek 700 euroko hiru sari irabazteko aukera edukiko dute. Urtarrilaren 10ean egingo dute zozketa.
Beste urte batez Gabonetako kanpaina berezia antolatu du Zatozte Ondarroako merkatari eta ostalarien elkarteak. Herrian erein, herria loratuz lelopean 2.100 euro zozkatuko dituzte urtarrilaren 5era arte elkarteko dendetan erosketak egiten dituzten bezeroen artean. “Elkarteko dendetan erosketak egiten dituztenei zozketan parte hartzeko txartelak oparituko dizkiegu. Zatoztek, modu horretara, erosleen fideltasuna eta herrian erosteari saria emango dio. Kanpaina berezi honegaz aurreko urteetan besteko erantzuna edukitzea espero dugu”.
700 euroko hiru sari banatuko dituzte. Zatozteko ordezkariek zehaztu dutenez, saridun bakoitzak 50 euroko hamalau erosketa txartel jasoko ditu Zatozteko saltokietan gastatzeko. Ohartarazi dutenez, erosketa txartel horiek non gastatu behar diren zozketa horretan zehaztuko da. Urtarrilaren 10ean egingo dute zozketa, 13:30ean, elkartearen bulegoan. “Elkarteko erakusleihoan eta gure sare sozialetan ipiniko ditugu zenbaki irabazleak eta horien bi ordezko zenbakiak ere. Urtarrilaren 16a da saria jasotzeko azken eguna; irabazleek lau hilabete izango dituzte saria gastatzeko”.
Argazki lehiaketako irabazleek 100 euroko saria irabazteko aukera edukiko dute
Elkarteko tabernariek beste kanpaina bat daukate paraleloki abian. Abenduaren 19ra arte tabernetan kontsumitzen dutenen artean ardo sortak zozkatuko dituzte. Hilaren 20an egingo dute zozketa. “Taberna bakoitzak ardo sorta bat zozkatuko du; hamahiru sari banatuko dira denetara”.
Herriko Gabonetako argiak hizpide hartuz, bestalde, argazki lehiaketa ere abiarazi dute. Argazki onena aurkezten duenak 100 euroko erosketa txartela irabaziko du. “Lehiaketagaz iaz hasi ginen, eta aurten esperientzia errepikatzea erabaki dugu”. Lehiaketan parte hartu nahi dutenek #gabonetakoargixak21 traola erabilita igo beharko dituzte argazkiak sare sozialetara. Argazkiak sarera igotzeko azken eguna urtarrilaren 3a izango da eta hurrengo egunean egingo dute zozketa.
