Jaitsiera postuetatik kanpo jarraitzen du Aurrerak
Talde ondarrutarrak bina berdindu du Amurrioren aurka Zaldupen. Talde biak aurkari zuzenak dira, eta garaipena lortzea oso garrantzitsua bazen ere, puntu banaketagaz konformatu behar izan dute.
Zapatuan [otsailak 12] Zaldupen hitzordu garrantzitsua zeukaten Mikel Etxaburu Pixki-ren mutilek, eta Amurrioren aurka gogor saiatu baziren ere, ezin izan zuten garaipena erdietsi. Etxeko taldea hobeto zelairatu zen, eta lehen ordu erdian euren jokoa egiteko aukera eduki zuten. Zelai erdian nagusi izan ziren, eta horrela heldu zen neurketako lehen gola ere; Jon Etxabururen erdiraketa bat baliatu ostean, Xabi Etxebarriak sartu zuen gola, 16. minutuan.
Golaren ostean, Amurriokoek euren lerroak aurreratu zituzten, eta partida orekatu egin zen. Arabarrek 39. minutuan lortu zuten berdinketaren gola. Lehen zatia berdinketagaz amaituko zela zirudien arren, Eñaut Gorosabel aurrelari etxebarritarrak alboko sake bat buruz errematatu eta Aurreraren bigarren gola lortu zuen.
Amurriokoek agindu zuten bigarren zatian; entrenatzaileak aldaketak egin zituen, eta baloiaren jabetza eurenganatu zuten. Hala, 70. minutuan ailegatu zen kanpokoen berdinketaren gola, eta hurrengo minutuetan gol aukera bat edo beste eduki bazuten ere, 2-2koagaz amaitu zen neurketa.
Urratutako puntu bakarra hasiera batean gutxi zela iruditu bazitzaien ere, aurkari zuzenen emaitzak lagun eduki dituztela esan dute, eta horri esker mailari eusteko postuetan jarraitzen dute beste aste batez. 29 puntugaz, 14. postuan dago taldea, Santutxu 13. sailkatuagaz puntuetan berdinduta. Entrenatzailearen iritziz, garrantzitsua zen partida irabaztea, eta ezinezkoa izan bazen ere, jokalarien lan ona eta zaleen babesa azpimarratu nahi izan ditu. “Ondo ari gara lanean, eta apurka-apurka puntuak batuz goaz. Puntuak batzeko bide horretan lagun ditugu zaletuak, eta beraien babesagaz puntuak batzea errazagoa da”.
Aste honetan bi jardunaldi jokatuko dira 3.mailako 4.multzoan. Aurrerak Eibarko unbe zelaian jokatuko du lehenengoa, eguaztenean [otsailak 16], 19:30ean, sailkapenaren goialdean dagoen CD Vitoriaren aurka. Hurrengoa Azpeitiko Lagun Onak taldearen aurka jokatuko dute, domekan [otsailak 20], 12:00etan, Zaldupen.
