Lekeition ospatuko da Bizkaiko bosgarren Nagusien Eguna
Ekainaren 4an 1.000 pertsona baino gehiago aurreikusten dituzte egun osoko egitarauaz gozatzeko prest
Jose Ramon Landaluze, Maite Zabala, Koldo Goitia eta Nagusiak Elkarteko kideak Lekeitiok hartuko du Bizkaiko Nagusien Eguna ekainaren 4an. Gaur [maiatzak 26] egin dute aurkezpena Lekeitioko Udaletxean Jose Ramon Landaluzea Nagusiakeko lehendakariagaz, Maite Zabala lehendakariordeagaz eta Koldo Goitia Lekeitioko alkateagaz. Bi urteko etenaldiaren ostean, 2020an ospatu beharko zena aurten ospatuko dute jai giroan, bosgarren aldiz antolatu dute, aurretik Balmasedan, Sopelan, Bilbon eta Durangon bildu ziren.
“Azken bi urteetan ez dugu aukerarik izan nagusiak biltzeko eta erakutsi nahi dugu oraindik asko dugula emateko. Ikusarazi nahi dugu oso aktibo gaudela eta Nagusien Egunak moduko jardunaldietan gure indarra erakutsi nahi dugu”, adierazi du Jose Ramon Landaluze Nagusiak Bizkaiko adineko pertsonen elkarteko lehendakariak. Nagusiak Bizkaiko pentsionisten eta jubilatuen elkartea da eta bere baitan herriko 133 elkarte hartzen ditu, hau da, 45.000 pertsona guztira. Saretze eta batasun egun bat da: “Bizkaiko elkarte desberdinetako harremanak sendotzeko eguna da, jai giroan. Gozatzeko eguna da, gure artean elkartzeko eta ezagutzeko eguna da”. Jendea gogotsu dago, aurreikuspen denak goitik behera aldatu behar izan dituzte, “800 pertsona aurreikusi genituen, baina 1.000 pertsona baino gehiago bilduko gara, horrek asko poztu gaitu”.
Jaia bai, baina aldarrikapenak ere bai. Maite Zabala Nagusiakeko lehendakariordeak eta Lea-Artibaiko delegatuak aurrez aurreko arreta aldarrikatu nahi izan du: “Nagusiak gizarteko zati aktibo bat garela erakutsi nahi dugu. Dena ezin daiteke internet bidez egin, aurrez aurreko harrera ezin daiteke kendu inondik inora. Batzuk ezta telefonoz ere ez dira moldatzen, ez daude eroso”. Azken urteetan lehen arreta jaitsi egin da eta asko izan dira nagusiek egin dituzten elkarretaratzeak, batez ere osasun zentroetara eta banketxeetara lotuta. Protesta horiek fruituak eman dituzte. “Banketxeetan, adibidez, ordutegiak moldatu dituzte. Bizkaiko Foru Aldundiak aurten errenta aitorpenetarako aurrez aurreko arreta berreskuratu du, iaz bertan behera geratu ostean”, esan du.
Aurkezpenean Koldo Goitia Lekeitioko alkateak esan du “ohore” bat dela Nagusiak Elkarteak Lekeitio aukeratu izana haien eguna ospatzeko toki moduan. “Ekainaren 4an Lekeitiora etortzen direnak beso zabalekin jasoko ditugu eta haien egunaz gozatzeko erosotasun denak eskainiko ditugu. Jaiaren ardatza plaza izango da, eta bertan prestatuko dugun karpa erraldoia. Horrez gain, herriko musika talde desberdinek parte hartuko dute baita erraldoiek ere. Pixkanaka udala ere pandemia aurreko egunerokotasuna berreskuratzen doa eta alde horretatik “urtean behin behintzat ekitaldi handi bat antolatzen”. “Pandemia garaian asko sufritu duen talde bat da eta Lekeitioko herriak bere babesa erakutsi nahi izan dio jai egun hau antolatzen”, azpimarratu du Goitiak.
Hurrengokoa da ekainaren 4ko egitaraua:
10:00-10:30 Autobusen iristea
10:30 Geralekutik plazara bidean Itxaropena txistulariak eta erraldoiak
10:55 Harrera egiteko suziriak
11:00-11:30 Agintarien harrera plazan, udaletxe aurrealdean “eguraldi txarra badago Basilikan egingo da
11:45-14:00 Bisita Gidatuak
Andra mariaren zeruratzearen basilika
Marierrota
Itsasargia
Alde Zaharra
11:45-14:00 Kalejira Lekeitiotik
15:00 Bazkaria plazan
17:00 Kontzertua plazan
19:30 Ekitaldiaren amaiera
