Gogotik ospatu dituzte San Pedro jaiak, Munitibarren
Gaur [uztailak 2] adin guztietarako ekintzak antolatu dituzte eta herri bazkarian elkartu dira denak
San Pedro jaiak ez dira edozein jai, are gutxiago Munitibarren. Herriko jai nagusiak dira, hain zuzen ere, eta aurten gainera erabateko normaltasunean ospatu ahal izan dituzte bi urteko pandemiaren ostean.
Gaur [uztailak 2] atzera begira jarri dira lehendabizi, memoria egin dute. Munitibarko Udalak Ahaztuen Oroimena elkarteagaz batera Memoria Lekuak ekimenaren aurkezpena egin dute. Asko izan dira herriko historian barneratu nahiizan dutenak. Lehen ibilbide gidatua osatu dute, herriko bost puntutan elkartu dira Gerra Zibileko bonbardaketako hobi desberdinen inguruko informazioa jasotzeko, abade etxeko ortuko hobia edo Zubialdekoa besteak beste. Bi ordu inguru iraun du bisita gidatuak.
Bitartean herriko txikienak frontoian elkartu dira. Bertan antolatu dituzte umeentzako joko eta puzgarri asko. Pedaleko autoekin zirkuitu bat egiteko aukera izan da zalantzarik gabe arrakastatsuena, denek nahi zuten parte hartu. Beste batzuk eskaladaren aldeko apustua egin dute, berriz.
Une ezin hobea izan da guraso eta kuadrillek paellak prestatzen hasteko. Bakoitzak bere txokoa aurkitu du eta denboragaz hasi dira janaria prestatzen, barazkiak mozten edo salda berotzen. 14:30ean denak elkartu dira herriko plazan jarritako karpan bazkaltzeko, guztira 150 herritar elkartu dira. Asko izan dira gainera jai batzordeari so eginez Euskal Herriko pertsonaia mitologikoetaz mozorrotuta atera direnak.
Arratsaldean musika izan dute protagonista jai giroa luzatzeko. 18:00etan herriko plazan elkartuko dira Sakatu Elektrotxarangagaz gerriak mugitzeko prest eta Iratzar erromeriak hartuko du testigua 21:30ean.
