Aringa-Aringa Kirol Klubak Markina-Xemeingo Karmen Jaietako krosa antolatu du
Uztailaren 9an da lasterketa eta izen ematea egunean bertan eman ahalko da.
Gero eta gutxiago falta da Markina-Xemeingo Karmen Jaietarako, baina asteburu indartsuena heldu aurretik udalak beste hainbat ekintza antolatu ditu. Horietako bat, garrantzitsuenetako bat, Aringa-Aringa kirol klubak antolatutako krosa da. Kirolaz beteriko eguna izango da uztailaren 9koa, goizean XII. Duatloi txiki lehiatuko baita.
Krosa 18:00etan hasiko da Zelaitik eta parte hartzaileek hurrengo ibilbideari bi itzuli eman beharko dizkiete, hau da, guztira 7,8 kilometro: Zelaia, Xemeingo Eliza, Arretxinaga, Barroeta futbol zelaia, zubia, Bekobenta, bidegorria, kiroldegia eta Udaletxea Zelaira itzuli aurretik.
Izen ematea doako da eta bi bide zabaldu dituzte. Batetik, aurretiaz egin nahi duenak www.herrikrosa.eus webgunearen bidez, eta bestetik, egunean bertan 16:30etik 17:40ak arte Zelaian. Antolatzaileek jakinarazi dutenez, 16 urtetik beherakoek gurasoen baimena eskatu beharko dute.
Sariei dagokionez, neskentzako eta mutilentzako egongo dira. Sailkapen orokorrean, irabazleak txapela, oroigarria eta 50 euro eramango ditu etxera, bigarrenak oroigarria eta 30 euro eta hirugarrenak oroigarria eta 20 euro. Horrez gain, herritarren artean lehen hiru sailkatuek oroigarri bana irabaziko dituzte.
