Ondarroak eta Lekittarrak ez diote hasiera ona eman Eusko Label Ligari
Asteburuko lehen bi jardunaldien ostean, biak ala biak hirugarren txandan daude.
Ez da Antiaguako Amak eta Isuntzak espero eta nahi zuten hasiera izan. Aurretik, bi entrenatzaileek, Iñaki Errastik eta Osertz Aldaik, lehen estropaden garrantzia nabarmendu zuten arren, uretan ezin izan dute hori erakutsi.
Zapatuan [uztailak 2] Bilboko ibaian eman zitzaion hasiera 2022ko Eusko Label Ligari Bilboko XIII. banderagaz. Hasiera ez ohiko izan zen, erlojuaren aurka egin behar izan zuten lan arraunlariek, uretako erreferentziarik gabe, denborakoak bakarrik. Iazko sailkapen nagusiaren arabera antolatu ziren txandak eta traineru bakoitza minutu bateko tartean irten zen.
Lekittarra lehen txandan aritu zen Ares eta Getaria eta Kaiku igoberriekin. Isuntzari ez zitzaion ondo eman erlojupekoa eta erreferentziazko hiru puntuetan denbora txarrena ezarri zuen, baita helmugan ere, 20:24:28.
Ondarroa bigarren txandan irten zen, Bermeo eta Zierbenarengandik urrun ibili ziren ondarrutarrak eta lehia Cabogaz izan zuten. Lehen bi erreferentzietan denbora hobeak ezarri arren, estropada luze egin zitzaien eta azkenean txandako laugarren tokiaz gain, lehenengoko Kaikuk eta Getariak hartu zieten aurre, 20:20:86. Ohorezko txandan, Donostiarraren zorte txarragaz medio, Oriok irabazi zuen lehenengo bandera. Lekittarra 12. izan zen eta Ondarroa 10. Ez zen hasiera ona izan.
Atzo [uztailak 3], berriz, egoerak guztiz desberdinak izan ziren, Donostiako badian olatuak eta haizea izan ziren protagonistak. Gustuko baldintzak Lea-Artibaiko bi traineruentzat. Aurreko eguneko emaitzekin Ondarroa eta Isuntza hirugarren txandan parte hartu zuten.
Lekeitiarrek Iñaki Goikoetxearen patroitza lana ezin hobeto baliatu zuten eta lehia ederra izan zuten Kaikugaz, ea nork olatu hobea eta luzeagoa hartu. Sestaotarrek bigarren ziaboga baino lehen hartu zutena izan zen erabakigarria. Hala ere, Ondarroagaz izandako kale arteko borrokarengatik hiru segundoko isuna izan zuten ezkerraldekoek eta horrek azken metrora arte borrokatzera eraman zituen Osertz Aldairenak, 21:15:38 haien denbora.
Antiguako Amak oraindik ez du Errastik nahi zuen arraunerako gozamen hori aurkitu. Aresekin izan ziren lehian, aurretik hirugarren eta azken ziaboagara arte, baina berriro azken luzean ezin izan zuten lana borobildu. 21:37:37 ondarrutarren denbora, eguneko txarrena.
Etxeko banderan Donostiarrak lortu zuen garaipena Hondarribiri azken luzean aurrea hartu ostean eta lehen aldiz jarri da Eusko Label Ligako lider. Lekittarra zazpigarren izan zen XIV. Fabrika banderan eta Ondarroa hamabigarren.
Antiguako Ama da, hain zuzen ere, sailkapen nagusiko azken postuan dagoen trainerua lau puntugaz, Aresegaz berdinduta. Lekittarrak Donostian lortutako sei puntuekin hamargarren postuan dago zazpi puntugaz. Datorren asteburuan Galiziara joko du Eusko Label Ligak, A Coruñako VI. Bandera jarriko da jokoan, bi jardunaldiko lehen bandera izango da.
