Eztanda egin dute Markina-Xemeingo Karmen Jai herrikoiek
Nerea Ibarzabal bertsolariak irakurri du pregoia, bertsoekin tartekatuta, eta herritarrak izan ditu gogoan
Hasi dira Markina-Xemeingo Karmen jaiak. Alarabiren jaitsiera eta gero, Nerea Ibarzabal izan da txupina emateko arduraduna. Zelan ez, ezin zuen beste edozein modutan hasi, bertsotan ekin dio Ibarzabalek pregoiari. “Poz berezi bat dakarten norberaren herriko jaiek”.
Hain zuzen ere, jendearen balioa nabarmendu nahi izan du, herriak eta herritarrak. “Herria jendearen irudimenetik hasi da, gure burutik, jendeak gorpuzten du herriaren egunetik eguneko bizia. Jendeak darabil hizkuntza, jendeak eusten ditu etxeak, jendeak ematen die bizia kaleei. Bakoitzak bere karmenak dituelako, bakoitzari sentipen bat sortzen diolako plaza honek”, hasi da bertsolaria.
Herriaren irudimenezko maketagaz jarraitu du, bertsoak tartekatzen zituen bitartean. “Jaietan lurrak dar-dar egiten du, denok elkartzen gara, mapa hankaz gora jartzen dugu, Zelaia jantoki bihurtzen da, espaloia dantzaleku eta Markina-Xemeinera trena heltzen da eta guzti”.
“Esperimentuak dira norberaren herriko jaiek” eman dio jarraipena zatikako bertsoari Ibarzabalek. “Inor zapaldu nahi baduzu, ez dira zuretzako jaiek”, nabarmendu du doinuagaz. “Herria gure burutik hasten bada, izan daiteke birsortzen den herri bat. Gora gure herriko jaiek”, eman dio amaiera bertso eskolako neska mutilen koruekin.
Txikienek izan baitute azken hitza: “Gora bertso eskola, gora Karmen jaiak, gora Markina-Xemein”. Eta eztanda egin dute Markina-Xemeingo Karmen Jaiek. Aurretik egitarau oparoa dago, asteburutik hatarago luzatuko dena.
