EH Bilduk Euskal Herriko aberria aldarrikatu du Ziortza-Bolibarren
Hispanitatearen Egunean euskaldunek “ospatzeko ezer ez” dutela esan du Arnaldo Otegik.
EH Bilduren ordezkariak, gaur, Ziortza-Bolibarren. Argazkia: EH Bildu Gaur [urriak 12] EH Bilduk agerraldia egin du Ziortza-Bolibarren, hispanitatearen eguna ospatzen den egunean. Simon Bolivarren sustraiak dauden herrian, Arnaldo Otegi alderdiko koordinatzaile nagusiak Euskal Herriaren aberria aldarrikatu du: “Egun hau gure modura ospatzeko toki oso egokia da. Bolivarrek egin bezala, Euskal Herritik mundura herri guztien askatasuna, burujabetza eta harrotasuna hedatu nahi dugu”.
Euskaldunek gaurko egunean “ospatzeko ezer ez” dutela esan du Otegik, uztailaren 14an frantziar errepublikaren eguna ospatzen ez duten bezala. “Desfile militar batekin ospatzen dute hispanitatearen eguna, eta desfile horren burua Francok jarritako estatu buru bat da”. Espainiak bandera, hizkuntza, aberria eta antolaketa inposatzen dituela salatu du Otegik: “Gaur hemendik garbi esaten diegu ez dugula onartuko, ez dugula onartzen eta ez dugula sekula onartuko proiektu hori. Gurea aberria Euskal Herria delako, gurea herri gehiengoa delako, gurea Euskal Herria askatua delako”.
Burujabetzaren aldeko apustua luzatu dute eta horren alde borrokatzen duten herriei “gure babesik eta elkartasunik handiena” bidali nahi izan die. Hain zuzen ere, Otegik langileak ere izan ditu gogoan, “nazio berekoak ez izan arren, klase berekoak garelako”. “Euskaldunak gara, baina bat egiten dugu langileek mundu osoan zehar dituzten borroka guztiekin”.
Argazkia: EH Bildu
Euskal Herria inklusibo baten aldeko deia luzatu du EH Bilduko koordinatzaile nagusiak. “Euskal Herria inklusibo bat da gurea, langileena eta emakumeena, gurea askatasuna eta berdintasuna delako”. Bide horretatik alderdi politikoak dituen hurrengo erronkak ekarri ditu gogora, besteak beste, klima aldaketa, berdintasuna edota langileen egoera.
Horrez gain, Otegik ez du aukera pasatzen utzi nahi izan, eta EH Bilduk azaroaren 12an Bilbon egingo duen manifestaziorako deia luzatu du. “Euskal Olatu Geldiezina” martxan jartzeko deia egin du: “Hartara, datorren azaroaren 12an Bilbon egongo gara. Gaur Ziortza-Bolibartik Euskal Herrira bidaltzen dugun gonbidapena da hau. Antifaxista guztiok, bakezale guztiok, soberanista guztiok, aurrerakoiak diren sektore guztiok Bilbo beteko dugu. Ez gaituzte geldituko!”.
