Martxan dago zesta-puntako 35. Berritxu Saria Txapelketa
50 puntista baino gehiago daude parte hartzen lau mailatan banatuta.
Pro-Am Winter Serieseko parte hartzaile askok eman dute izena Berritxu Saria Txapelketan. Argazkia: Berriatuko zesta-punta eskola Berriatua zesta-punta herria da, orain dela duela aste batzuk amaitu zen Pro-Am Winter Series txapelketa, eta orain 35. Berritxu Saria Txapelketaren txanda da Mendibarren frontoian. 11. Luis Bilbao memorialean 60 puntistak eman dute izena lau maila desberdinetan banatuta.
Gazte mailan, bi multzo osatu dituzte eta bakoitzean lau bikote daude, bi onenek egingo dute aurrera finalaurrekoetara. Bi bikote bide onetik hasi dira, martitzenean [urriak 25] Martinek eta Lakik 30-27 garaitu zituzten Txanton eta Peru, bestetik, Orkatzek eta Oinatzek errazago hartu zituzten mendean Danel eta Eneko, 30-19. Gaur [urriak 27] Orkatzek eta Oinatzek Erkiaga eta Kirmenen kontra neurtuko dituzte indarrak 19:15eatik aurrera.
Nesketan pilotaririk onenak elkartuko dira, azken asteetan Euskal Herriko Txapelketan parte hartu dutenak, orain Munduko Txapelketa lehiatzen daude batzuk Iparralden. Ihart-Frida, Elaia-Arai, Maite-Maddi, Erika-Eneritz eta Naroa-Maialen dira aurtengo bikoteak. Maila handia ziurtatuta dago.
22 urte azpiko mailan harrobiko harri bitxiek jokatuko dute. Hemen ere lau bikoteko bi multzo osatu dituzte eta lehen partidak dagoeneko jokatu dira: Atzo [urriak 26] Danelek eta Arandiak 30-26 irabazi zieten Aitzol eta Diazi. Gaur [urriak 27] beste partida bat jokatuko da Reto eta Amets Arandia eta Danelen aurka. Bihar [urriak 28] Arrasate-Argoitia eta Unax-Elkoro bikoteen arteko lehia jokatuko da.
Elite mailan ere izen handiek eman dute izena, hiru bikoteko hiru multzo osatu dituzte. A multzoan daude Cosme-Aldazabal, Antxon-Lekue eta Bixente-Salegi; B multzoan Gonzalo-Portet, Barandika-Atain eta Urrutia-Aimar; eta C multzoan Aaron-Zabala, Eñaut-Manci eta Arbe-Ibarluzea. Batzuk Pro-Am Winter Seriesean parte hartu zuten, beste batzuk, ordea, datorren astelehenean Gernika-Lumoko urriko azken astelehenean hasiko den Jai Alai Winter Seriesean ariko dira.
