Markina-Xemeingo Uni frontoiko ezaugarriek aldea ezarri dezakete
Gaur [otsailak 7] zapatuko [otsailak 11] jaialdiko pilota hautaketa egin dute Elordi-Zabaleta eta Laso-Eskiroz bikoteek.
Zabaleta-Elordi urdinez eta Laso-Eskiroz gorriz. Markina-Xemeingo Uni frontoiak esku pilotako binakako txapelketako 12. jardunaldiko partida hartuko du zapatuan [otsailak 11]. Nor baino nor gehiago ariko dira Aitor Elordi eta Jose Jabier Zabaleta eta Unai Laso eta Josu Eskiroz, azken honek min hartuta dagoen Ander Imaz ordezkatuko du. Sarrera gutxi batzuk geratzen dira, giro ezin hobea aurreikusten da.
Gaur [otsailak 7] lau pilotariek partidarako materiala hautatu dute. Inork ez du pilotekiko kexarik jarri. Hori bai, Uni frontoiaren ezaugarriak izan dituzte hizpide, pilotaleku asko baino metro bat altuagoa eta metro bat zabalagoa da markina-xemeingoa. Laso eta Eskirozen arabera, sailkapeneko liderren jokoarentzako frontoi “aproposagoa” da: “Zabaletak ikaragarri ematen dio pilotari eta metro bat gehiago izanda are zailagoa izango da. Elordik, gainera, sake bikaina dauka eta errematatzerakoan metro bat gehiago defendatu beharko dugu”.
Hain zuzen ere, bi bikoteak egoera oso desberdinetan daude txapelketan azken jardunaldiaren ostean. Berriatuan bizi den mallabiarrak eta nafarrak finalerdietarako txartela ziurtatuta dute lidergoan. “Ez dugu askorik jokoan, baina maila ona ematen jarraitu nahi dugu orain arteko partida denetan egin bezala. Azken jardunaldiak finalaurrekoak prestatzeko erabili behar ditugu, denboraldiaurre labur bat bailitzan, lan apur bat kargak aldatuko ditugu”, azaldu Zabaletak. Elordik gehitu du helburu berria dela finalaurrekoetarako “ahalik eta modurik onenean heltzea, fisikoki eta baita eta joko aldetik ere”.
Aurrelariak ezin izan du ezkutatu partida berezia izango dela berarentzako etxetik hain hurbil jokatuta: “Unin jokatu nuen azken partidatik oroitzapen bikainak ditut, jende asko elkartzen da beti eta giroa ezin hobea izaten da. Bete-beteko ikuskizun bat eskaini nahi dugu, maila handia emanez gozatu dezaten”. Mallabiarra gozatzen ari da binakako bere lehen txapelketan. “Zabaleta handi bategaz jokatzen ari naiz, tantoak dominatzen ditu, baina gero nik aurreko koadroetan nire lana egiten ari naiz. Min hartu nuen eta indartsu itzuli naiz, atsedenak mesede egin zidan”.
Bestelako bidea. Laso eta Eskiroz oso bestelako egoeran daude joan den domekan Altuna eta Tolosa aurkari zuzenen aurka galdu ostean. Hirugarren postuan daude, beste hiru bikotek baino garaipen bat gehiagogaz bakarrik. Txikitatik lagun handiak dira biak ala biak, eta lehen aldiz ariko dira batera txapelketan, “ilusio handia” dute batera jokatzeko.
Kointzidentziak ez dira hor geratzen, Eskirozek eta Zabaletak ere batera entrenatzen dute egunero. Joan den zapatuan elkarren aurka jokatu zuten lehen aldiz, eta orain bi aldiz jarraian. “Ikaragarri jokatzen du Zabaletak, ez du pilotakada bategaz tantoa hausten, bata bestearen atzetik dira, tarteak irekitzen ditu frontoian eta gero zuloak estaltzea oso zaila da”, aztertu du atzelariak. Ordezkapen lanetan laugarren aldiz ariko da Eskiroz aurtengo txapelketan: “Enpresak konfiantza jarri du nigan eta oso pozik nago, momentu gogorrak pasa ditut, baina orain zorionez, une politak bizitzen ari naiz”.
Lasok argi du zapatuan ez direla faborito izango: “partida zaila izango dugu, gogotik lan egin beharko dugu aukerak izan ahal izateko. Bigarren postua urrun dugu, baina partidaz partida joango gara borrokatzen”. Hala ere, txapeldunak gogoratu du partida bakarrera edozer pasa daitekeela, “iaz ere finalaurrekoetako lehen partida galdu zuen Zabaletak, beraz, auskalo”.
