Iñigo Urkullu: "Jarraitu dezagun arrantza sektorea babesten eta laguntzen"
Lehendakariak Ondarroako portuko lonja berria bisitatu du gaur goizean [martxoak 4]. Arrantza kate osoak egunez egun egiten duen lana eta esfortzua aitortu, eta emakumearen lanari aipamen berezia egin dio.
Iñigo Urkullu lehendakaria, lonja bisitatzen Arranza sektorea balioan jarri eta laguntzen eta babesten jarraitzeko deia egin du Iñigo Urkullu lehendakariak gaur goizean [martxoak 4] Ondarroako arrain lonja berrira egindako bisitan. “Arrantza ez da babestu beharreko lanbide klasiko bat. Gure bizimodu eta kulturaren parte bat da. Sektore estrategikoa bat, hain zuzen ere. Behar zaituztegu, eta horretarako ezinbestekoa da horrelako azpiegiturak eraikitzea”, adierazi du.
10:00etan heldu da Lehendakaria portura, eta bertan egin diete arrera, besteren artean, Arantxa Tapia Ekonomiaren Garapen, Jasangarritasun eta Ingurumeneko sailburuak, Bittor Oroz Nekazaritza, Arrantza eta Elikagaien Politikako sailburuordeak, Aitor Etxebarria Atutxa Portu eta Itsas Gaietako zuzendariak, Leandro Azkue Arrantza eta Akuikultura zuzendariak eta Zunbeltz Bedialauneta Ibaibarriaga Ondarroako alkateak. Lonja berria inguratuz hasi dute bisita eta, ostean, instalazioak ezagutu dituzte, Eusebio Arantzamendi Ondarroako Kofradiako presidentearen eta Esther Llorente komertzializatzailearen eskutik. “Eskerrik asko arrantza sektorearentzat horren garrantzitsua den eta izango den azpiegitura hau lehen eskutik ezagutzeko aukera emateagatik”, nabarmendu du Lehendakariak.
Arrantza kate osoak egunez egun egiten duen lana eta esfortzua aitortu, eta emakumearen lanari aipamen berezia egin dio: “Emakumeen lana bereziki aipagarria da, saregileena, neskatilena edo paketatzaileena. Arrantza lege berriak emakume hauei aldarrikapen historikoak ematen eta onartzen dizkie, Euskadin bultzada eman diogu lorpen honi, eta zuokin batera ospatzen dugu. Erakundeen lana eta ardura da zuoi ahalik eta erraztasun gehien ematea”. Balioan jarri du baita ere Antiguako Ama arrantza eskolak egiten duen lana: “Etorkizuneko arrantza jasangarriari erantzuteko gazteak prestatuko dira, hala espero dugu. Segi dezagun, beraz, arrantza sektorea babesten eta laguntzen”.
“Emakumeen lana bereziki aipagarria da. Arrantza lege berriak emakume hauei aldarrikapen historikoak ematen eta onartzen dizkie, Euskadin bultzada eman diogu lorpen honi, eta zuokin batera ospatzen dugu
Kofradiako presidenteak esan du egun berezia dela gaurkoa: “Ondarroako portua egun berezia bizitzen ari da gaur zuon bisitagaz. Ondarroako portua osatzen dugun guztiontzat portu honek izan duen aldaketa benetan garrantzitsua izan da. Beraz, eskerrak eman nahi dizkizuet guztion izenean hau posible egin duzuen guztioi”. Elkarlanean jarraitzeko konpromisoa adierazi du, Ondarroan eta Euskal Herrian sektoreak etorkizuna izan dezan.
Erreferentziazko lonja. Zunbeltz Bedialauneta Ibaibarriaga alkatea ere pozik azaldu da, urte asko eta gero lonja berria egitea lortu delako. “Herrian, zoritxarrez, itsasontzi gutxi daude, baina asteon Kantabriako eta Galiziako 80 bat txalupa ibili dira antxoagaz. Inguruko lonja onena daukagu, erreferentziazkoa, etorri daitezen”. Antiguako Ama arrantza eskola eraikin berrian inauguratu izanagatik ere pozik agertu da, arrantzak etorkizuna izan dezan garrantzitsua izango delako: “Punta-puntako simulatzaileak, makineria daukate. Horregaz batera, urpekaritza profesionalentzako eskola egin nahi dute”.
