Tailerraren aurkezpen hitzaldia martxoaren 30ean egingo du Nere Erkiaga bideratzaileak.
Lekeitioko arrakastaren ostean, bi aldiz antolatu dute bertan, Markina-Xemeineraino helduko da ‘Hil Arte Bizi’ egitasmoa. Markina-Xemeingo Udalaren helburua da gaia “naturalizatzea” eta gaiaren inguruan herritarrak “ahalduntzea”: “herritarrek beraien heriotzaren inguruan dituzten eskubideak ezagutarazi, gogoeta sustatu eta hartu ditzaketen erabakiak argitzen lagunduko die”.
Jendea erakartzeko intentzioarekin, lehenengo aurkezpen hitzaldia egingo dute martxoaren 30ean 18:30ean kultur aretoan. Prozesua lau tailer bidez osatuko dute, bertan hainbat gai jorratuko dituzte: heriotzarekiko ideiak eta esperientziak; ondasunak, sare sozialak edota bestelako erabakien inguruko kontu praktikoak; hil ostekoaren inguruko desirak eta agurra eta legatuaren inguruan ariko dira.
“Heriotza tabu handi bat da gaurko gizartean, eta tabu horrek herritarrak eta erakundeak beraien eskubide eta erantzukizunak garatu gabe egotea eragiten du. Halere, heriotzaren inguruko gaiek gero eta garrantzi handiagoa izango dute etorkizunean, eta, beraz, heriotza politika publikoetan integratu beharra egongo da”.
Egitasmoaren arduraduna Nere Erkiaga da. Tanatologian, parte hartze dinamiketan eta kutur transmisioan aditua da Erkiaga. Aurkezpena eta tailerrak euskaraz izango dira eta izen ematea martxoaren 31n hasiko da udaletxeko Berton bulegoan 20 euroren truke. Informazio gehiago nahi dutenentzako 644 12 60 91 telefonoa jarri dute eskuragarri. Antolatzaileek esan dute gutxieneko kopuru bat egon behar dela tailerrak aurrera eraman ahal izateko. Egitasmoa lau astetan egingo dute, maiatzaren 17an, 14an eta 31n eta ekainaren 7an, 18:00etan izango dira eta tokia oraindik zehazteke dago.
