Marc Cabedok irabazi du Markina-Xemeingo 32. Sabin Foruria Haitzasko Oroimenezkoa
Iker Mintegi da Euskaldun Torneoko lider berria zapatuko [martxoak 25] seigarren probaren ostean.
Marc Cabedo irabazlea, Julen Arriolabengoa bigarrena eta Iker Mintegi hirugarrena. Telco talderik onena. Argazkia: Markina-Xemeingo txirrindulari elkartea. Lea-Artibaiko errepideak txirrindulariz bete ziren zapatuan [martxoak 25] Markina-Xemeingo txirrindulari elkarteak antolatutako 32. Sabin Foruria Haitzasko Oroimenezkoagaz. 162 txirrindularik eman zuten izena 118 kilometroko ibilbide gogorrari aurre egiteko. Telco ON Clima Oses talde nafarra izan zen lasterketako protagonista nagusia.
Hasteko, eguneko ihesaldian taldeko Edgar Cadena sartu zuten beste lau txirrindularigaz batera: Xabier Aransolo (Grupo Eulen-Nuuk), Galder Bengoechea (Baqué Team), Aitor Garmendia (Eibar) eta Aner Arozena (Electroalavesa-Zuia). Ihesaldiak etorkizun laburra zuela ikusita, mexikarrak erasoa jo zuen eta bakarrik egin zuen ihes erakustaldia emanez. Bi minutu baino gehiagoko errenta izan zuen Milioi edota Gontzagariganako mendateak pasa zituen. Orduan, tropeleko indartsuenek aurrera egin zuten eta Cadena harrapatu zuten.
Sei txirrindulariko talde batek jokatu zuen azken esprinta Markina-Xemeingo kaleetan: Sinuhe Fernandez (Aluminios Cortizo), Ben Houlihan (Eiser-Hirumet), Nil Gimeno (Gomur Cantabria Infinita), Iker Mintegi (Laboral Kutxa-Euskaltel Euskadi Fundazioa), Julen Arriolabengoa (Caja Rural) eta Marc Cabedo ( Telco. ON Clima Oses). Cabedo izan zen denen artean azkarrena, eta bere ibilbideko 23 urte azpiko lehen lasterketa irabazi zuen. Bigarren Arriola-Bengoa izan zen eta hirugarren Mintegi.
Irabazleak ibilbidearen “gogortasuna” nabarmendu zuen helmugan: “Azken taldean taldeko hainbat kide geunden eta ezin hobeto kudeatu dugu genuen nagusitasuna txirrindulari kopuru aldetik. Oso ondo lehiatu dugu, eta gainera garaipena lortu, beraz, oso pozik nago”. Hain zuzen ere, talde nafarra talde onenaren sailkapena irabazi zuen. Euskaldun torneoko sailkapen nagusiari dagokionez, Mintegi da lider berria 58 puntugaz, bat gutxiago du Arriolabengoak eta hirugarren kokatu da Cabedo 39 puntugaz.
