Amankomunazgoak adikzioen prebentziorako tokiko plan berriaren emaitzen aurkezpena egingo du
Bihar [martxoak 29] 18:00etan Markina-Xemeingo Esperantza eraikinean jarri dute hitzordua.
Lea-Artibai Amankomunazgoak 2022ko amaieran jarri zuen martxan adikzioen prebentziorako tokiko plan berria. Adikzioen fenomenoa “aldakorra” da, eta Amankomunazgoarentzat bere garaian martxan jarritako ekintzak “aztertu, ebaluatu eta eguneratzeko garaia” heldu da. Lehendabizi, diagnosi integral bat osatu zuten, ostean eskualdeko ikastetxeetan galdetegia bidali zuten eta gero herritarrengana hedatu zuten datu bilketa. Jasotako datuekin eztabaida taldeak sortu zituzten herriko eragile desberdinen artean.
Jakinarazi dutenez, guztira 1.925 pertsonak parte hartu dute prozesuan. Orain, bildutako emaitza guztiak kaleratzeko unea da, baita ateratako ondorioak azaltzeko momentua ere. Bihar [martxoak 29] 18:00etan emango dituzte argitara Markina-Xemeingo Esperantza aretoko Enpresa aretoan. “Aurkezpen ekitaldian ikusiko dugu besteak beste gazteen kontsumo ohiturak eta herriko eragile desberdinen eta hainbat herritarren beharrizanak eta proposamenak adikzio gaien aurrean”, adierazi dute Amankomunazgotik.
Aurkezpena Eusko Jaurlaritzako Osasun Publikoaren eta Adikzioen zuzendariak eta Lea-Artibai Amankomunazgoko Lehendakariak irekiko dute eta Amankomunazgoko teknikari batek eta Sasoia erakundeko beste batek emango du planeko informazio guztia. “Eskerrak eman nahi dizkiogu prozesu honetan parte hartu duten talde/elkarteetako eragile, ikastetxe, ordezkari politiko, guraso elkarte, osasun zentro, gazte ikasle eta herritar orori”. Bide batez, aurkezpenera bertaratzeko deia luzatu dute.
