Lekeitioko erresidentziako langileek lan baldintza txarrak salatu dituzte
Zapatuan [maiatzak 20] 13:30ean udaletxeko eskaileretan egingo duten elkarretaratzean parte hartzeko deia egin dute.
Erresidentziako langileek, Lea-Artibaiko Laneko Autodefentsa Sareagaz batera, “gutxieneko lan baldintzak bermatzeko” antolatu direla adierazi dute. Hain zuzen ere, eskatzen dutena da langile gehiago kontratatzea: “Langileko egoiliar kopuruak ez du uzten zerbitzu egokia eskaintzen, eta deshumanizatu egiten ditu erabiltzailea zein langilea”. Horrez gain, lan hitzarmena betetzea nahi dute, hainbat puntu “sistematikoki urratzen” direlako. Azkenik, lanerako “material eta baliabide egokiak” ziurtatzea eta “jazarpena gelditzea” eskatzen dute.
Laneko Autodefentsa Sareak dio sindikatuek “jarrera pasiboa” izan dutela arazoaren aurrean eta ez dituztela “hobekuntzara bidean behar beste” pauso eman. Diotenez, orokorrean zaintza sektoreko bizi baldintzak “ez dira onak”; estresa, lan karga handiak, baliabide egokien falta edota kontratazio falta “eguneroko ogia” direla diote.
Argazkia: Kontseilu Sozialista
Gainera, Uribarren Abaroa Fundazioak kontratutako gerentziaren kudeaketak baldintza horiek “are gehiago” okertzen dituela salatu dute. “Besteak beste, laneko segurtasuna bermatzeko beharrezko material falta, kontratazio faltaren ondoriozko lan erritmo jasangaitza, praktiketako pertsonala soldatapekoen funtzioak betetzen egotea, baja eta eszedentziak kubritzeko langilerik ez kontratatzea, egutegi aldaketak abisatzeko lan hitzarmenean zehaztutako denborak ez betetzea, kategoria altuagoko eginkizunak bete behar izatea eta horien erantzukizuna edukitzea dagokien lansaririk kobratu gabe edota lan hitzarmenean jasotako deskantsurako denbora ez errespetatzea”.
Horrez gain, salatu dute “ohikoak” direla langileekiko “mehatxuak, presioak edota xantaiak”. Eta ohartarazi dute lan baldintza txarrek egoiliarrei “zuzenean” eragiten dietela: “Ezinezkoa egiten zaigu kalitatezko zaintza zerbitzu bat ematea”. Azaldu dute Lekeitioko udal ordezkariek “erantzukizun zuzena” dutela udala fundazioaren parte delako eta, ondorioz, gerentziaren kontratazioaren eta enpresaren gestioaren berri duelako. Lan baldintza txarren aurrean “inolako aurrerapausorik ez” dutela ematen eta “entzungor” egiten dutela salatu dute; “dagokien erantzukizuna euren gain hartzea eta egoerari konponbidea ematea” exijitu diete.
