Amankomunazgoaren 'Konpost txapeldunak' kanpainak "harrera ona" eduki du
Erronka urte amaieran 950 tonatara iristea da eta maiatzaren 15era arte 307,64 tona batu dituzte.
Lea-Artibai Amankomunazgotik esan dute eskualdean azken urteetan “sekulako aurrerapausoak” eman direla hondakin organikoen birziklapenean. Era berean, adierazi duten orain arte lortutako emaitzak “hobetzeko tartea” dagoela. Horretarako jarri zuten martxan otsailaren 1etik martxoaren 31ra Konpost txapeldunak kanpaina. “Erronka kolektiboaren bitartez hondakin organikoen birziklapenean aurrerapausoak ematea bilatzen du kanpainak”. Aurreratu dutenez, udan kanpaina berriz martxan jarriko dute organikoen datuak “hobetzen jarraitzeko”.
Amankomunazgoak urteko lehen balorazio bat egin du, eta nabarmendu dute kanpainak “harrera ona” eduki duela. Batez ere, komunikazio aldetik egindako lana goraipatu dute, bide digitaletik zein offline bidetik. 1.300 pertsonatik gora bisitatu dute webgunea, “kanpainako euskarri nagusia”, eta datua “positiboa” dela esan dute. “Euskarri ezberdinak eta estrategikoak aukeratu izanak kanpainaren ikusgarritasuna sustatu du”.
Estrategia digitalean lehen pausoak eman dituzte, eta Instagram eta Facebook sare sozialak erabiliz publiko gazteagoarengana heltzea lortu dutla diote: “Orain arte heltzea zailagoa suertatu den adin-tarte batera heltzea lortu dugu”. Instagrametik 167 pertsona bideratu dituzte webgunera, eta Facebooketik 724. Bestalde, Amankomunazgotik Youtubeko kanaleko kanpainako bideoaren “arrakasta” nabarmendu dute. 25.000 ikustaldi baino gehiago eduki ditu eta 313 pertsona bideratu ditu webgunera. Horrez gain, QRak ere erabili dituzte eta horiek offline aukera zabaldu die.
Helburu argia. Erronka urte amaieran 950 tonatara iristea da, eta maiatzaren 15era arte 307,64 tona batu dituzte. Hain zuzen ere, helburua da 2020ko datuak berreskuratzea, 1.005 tona inguru. 2022an, adibidez, 863 tona bildu zituzten. Hala ere, gogoratu dute 2020a “konfinamenduaren urtea” izan zela eta ondorioz gehiago sukaldatu zela etxeetan eta hondakinak “modu zuzenean” sailkatzeko aukera gehiago egon zela.
Era berean, nabarmendu dute Lea-Artibai dela Bizkaian gehien birziklatzen duen eskualdea. Bizkaiko batezbesteko organikoaren bilketa tasa gainontzeko hondakinekiko %2,8 den bitartean, Lea Artibain %10,35 da (2021eko datuak). “Honek aberasgarritasun handia bermatzen die Lea-Artibaiko lursailei, eta hondakinen kudeaketan aurrezpen handia suposatzen du”.
