Lekittoko Mugimendu Feministiak Ujika prozesuko Pirt-Part fasea amaituko du
Barikuan [ekainak 16] 18:00etan azken eztabaida bilera egingo dute, udazkenean Zirt-Zart fasean erabakiak hartu baino lehen.
Lekittoko Mugimendu Feministia martxoaren 8an sartu zen Andraetxe berrian. Sarreragaz batera jarri zuten martxan Ujika prozesua, hau da, zelako espazioa sortu nahi duten inguruko hausnarketa. Hiru fase nagusi ditu. Lehendabizi, Tarratadia izeneko irudikapen fasea abiarazi zuten, eta horretan Andraetxia zelakoa izatea nahi dutenari buruz aritu ziren. Gero, Pirt-Part fasea hasi zuten, barikuan amaituko dena. Hilabete bakoitzean gai batzuen inguruan eztabaidatu dute. Apirilean Andraetxiaren helburu eta printzipioen inguruan aritu ziren, maiatzeko bileran antolaketa eta kudeaketaren inguruan egin zuten berba eta orain espazioaren txanda izango da.
Barikuan [ekainak 16] 18:00etan bilera egingo dute eta parte hartzeko deia egin dute. Besteak beste, Andraetxearen bigarren solairuaren inguruan ariko diela aurreratu dute: “Gaur egun ur eta argi barik dago, hau da, ezin da erabili, udalak esan bezala egokitu beharko luke”. Horrez gain, Andraetxeak zer beharrizan dituen aztertuko dituzte eta horren arabera espazioa moldatu. Pirt-Part faseko azken bilera izango da. Gero, udan atseden hartuko dute eta udazkenean abiatuko dute Zirt-Zart fasea, hau da, erabakiak hartzeko momentua.
“Metodologia egoki bat izateari eman zitzaion garrantzia, botere harremanak ekiditeko”
Bi aldeak. Maiatzean kudeaketa eta antolamenduaren inguruan aritu ziren hamar emakumek baino gehiagok. Bi taldetan banatu ziren eta irten ziren gai bakoitzaren indarguneak eta ahulguneak atera zituzten. Asanbladen beharrez hitz egin zuten, “iraunkorrak edo esporadikoak” izatea, esate baterako, ekintza zehatz bat antolatzeko. “Horretarako, metodologia egoki bat izateari eman zitzaion garrantzia, botere harremanak ekiditeko”.
Hain zuzen ere, esan dute “malgutasunari eta elkar zaintzeari” ematen diotala garrantzia: “Hau da, antolaketa edo kudeaketa zerbait zurruna beharrean egoeretara egokitu behar dela. Ardurak izatearen kontuari ere heldu zaio, ahal dela, errotatiboa izatea, inor ezinbesteko ez izateko, inor ez erretzeko”. Andraetxea espazio “seguru eta askea” izateko dekalogo bat idazteko aukera ere aztertu zuten. Ados jarri ziren urte hasieran “ezinbestekoa” izango litzaketela urteko balorazio bat egitea.
Kudeaketari dagokionez, autogestioaren aukera aztertu zuten, “menpekotasuna ezaren” onura edota “diru sarrera finko bat ez izatearen” beste aldea. Beste alde batetik, diru laguntzen “diru errazagoa” jasotzeko aukeraz ere hitz egin zuten, baita horrek dakarren “menpekotasuna”. Gainera, bazkideak izatearen inguruan aritu ziren eta guzti.
