Markina-Xemeingo Udalak prest du Merkataritza Indartzeko Plana
Iaz martxan jarritako Plan Bereziak herriko ekonomiaren errealitatea aztertzeaz gain, etorkizunerako helburuak eta bide orriak zehazten ditu.
Azken urteetan, pandemia garaitik batez ere, merkataritza sektoreak “etengabeko aldaketak” bizi dituela esan dute udaletik eta horrek “sakoneko transformazioak” ekarri ditu: internet bidezko erosketak, tokiko kontsumoaren garrantzia edota komertzializazio ereduen eraldaketa, besteak beste. Horrenbestez, “beharra” ikusi dute sektorea berrantolatzeko eta lehiakortasun maila handitzeko. Planak sektorearen erronkei “era ahalik eta aproposenean” heltzeko aukera ematen du. Gaineratu dute “berebiziko garrantzia” duela lehiakortasuna sendotzeko eta herritarrei gertuko zerbitzu oparo bat eskaintzeko.
“Ezinbestekoa” udalaren, Hemen Be Bai merkatari elkartearen eta Leartibai Fundazioaren elkarlana eta kolaborazioa.
Horretarako egin dute Merkataritza Indartzeko Plan Berezia. “Sektore indartsu bat izateak, herri-dinamikak garatzea eta herritarren bizi kalitatea bermatzea errazten ditu”. Ikertalde aholkularitza enpresak garatu du plana eta bi fase izan ditu. Batetik, gaur egungo herriko saltokien egoera aztertu dute.
Prozesu parte hartzaile bat eraman zuten aurrera herritarren eta sektoreko langileen iritzia jasoz. Herritarrak, kontsumitzaile bezala, telefonoz eta kalean egin zaizkie inkestak. Eskaintzaren ikuspegia jasotzeko, sektoreak ere inkesta bat bete du. Gainera, bi lan saio espezifiko burutu dituzte sektoreko eragile desberdinekin. Esan dutenez, “ezinbestekoa” izan da udalaren, Hemen Be Bai merkatari elkartearen eta Leartibai Fundazioaren elkarlana eta kolaborazioa.
Negozio arduradunen 1/3ak 55 urte baino gehiago ditu, “errelebo beharraren auzia islatuz” ondorioztatu dute
Inkestetatik bildutako datuen arabera, herritarren merkataritza gastuaren 3/4 inguru udalerriko establezimenduetan geratzen da. Herrian kontsumitzen ez dutenen gehienek Durangaldeko eta Bilbo Handiko hiri-merkataritza eta azalera handiko saltokietara joaten dira. Baina, era berean, Markina-Xemeingo negozioek “aldameneko herrietako bezeroaren gastuaren zati bat” bereganatzeko gaitasuna dutela ikusi dute.
Saltokiei dagokionez, negozioen 1/4ak hamar urte baino gutxiagoko antzinatasuna du. Horrez gain, negozio arduradunen 1/3ak 55 urte baino gehiago ditu, “errelebo beharraren auzia islatuz” ondorioztatu dute: “Negozioen digitalizazio maila nahiko mugatua da lehiakortasunaren aldetik gabeziak irudikatzen ditu”.
Bide orria. Azterlana eskuan izanik, udalak etorkizunerako ekintza planak zehaztu ahal izan ditu. “Sektorearen egungo eskaintza indartzea bilatzen da, jendeari aukera komertzial zabala eskainiz bertan kontsumitu dezan, herriari klima biziagoa eta erakargarriagoa emanez”. Horrela ikusi dute “merkataritza agertokia hobetu” behar izana, komunikazio eta dinamizazio “estrategien garapena” edota negozioen “lehiakortasun mailaren areagotzea”. Gainera, Hemen Be Bai elkartearen indartu beharra ikusi dute baita beste sektoreekiko “hibridazio egitasmoen sustapena” eta eragileen arteko “koordinazioa eta gobernantza” garatzea.
