Kirola sustatzea helburu duen herri krosak hartuko du Etxebarria
Zapatuan Etxebarriko III. Herri Krosean parte hartzeko aukera izango dute herritarrek. Momentuz 40 lagunek izena eman dute, baina izena emateko epea zabalik dago oraindik.
Etxebarriko Herri Krosean elkartuko dira herritarrak zapatuan, 11:00etatik aurrera. Hirugarrenez antolatu du Txik-Txak kirol elkarteak kirol eta aisialdi jarduera hori, eta aurrekoetan legez, hiru ibilbide egokitu ditu: laburra, ertaina eta luzea.
Ibilbide laburrak 11:00etan izango du hasiera, eta 100 metroko luzera edukiko du. Bigarren lasterketa, 11:30ean hasiko da, eta 1.200 metro luzekoa izango da. Luzeena izango da hirugarrena, 6 kilometrokoa, eta 12:00etan emango diote hasiera horri.
“Herritar askok parte hartzen dute herri krosean, umeek zein nagusiek. Horregatik prestatzen ditugu hiru probak, herritar gazteenei ere parte hartzeko aukera eskaintzeko”, azaldu dute. Hala, lasterketa laburrenean umeek parte hartzen dute gehien, eta ertainean, adin guztietakoak batzen dira. Sei kilometrokoan, berriz, forma fisiko onean daudenak aritzen dira.
Gaur gaurkoz, 40 lagun inguruk izena eman dute, baina azken egunetan parte hartzaile kopurua igotzea espero dute antolatzaileek: “40 lagun inguruk izena eman dute momentuz, baina azken egunetan parte hartzaile kopurua igo egiten da. Guk 75-80 lagunentzako proba prestatu dugu”.
Izen ematea www.kirolprobak.eus webgunean egin daiteke, baita Olaia tabernan ere. Era berean, egunean bertan ere iznea eman ahalko dute gura dutenek.
Atletismoarekiko zaletasuna bultzatzea da Txik-Txak elkartearen asmoa, eta hori bultzatzeko urtean 3-4 ekitaldi prestatu ohi dituzte, denak filosofia beragaz: herritar guztien parte hartzea bultzatzeko asmoz, sari konkreturik barik eta jai giroa sortzeko helburuz. “Gure pentsaera ez da lehiakortasuna bilatzea. Herri krosean ez ditugu denborak hartuko, eta denontzako sariak izango ditugu”, azaldu dute.
Lasterketa eta gero, mokadua edukiko dute parte hartzen duten guztiek; gainera, dutxak ere erabilgarri izango dituzte, eta denetariko zozketetan parte hartzeko aukera izango dute.
