Dantza artean ospatu dute Amoroton San Martin eguna
Gaur [uztailak 4] emango diote jaiei hasiera ofiziala Txan Txun Txunen igoeragaz.
San Martinek ematen die izena Amorotoko jai nagusiei. Hain zuzen ere, gaur [uztailak 4] ospatu dute amorotarrek jaietako egun nagusia San Martin egunean. Herritarrak meza nagusian elkartu dira lehenengo, nagusienak batez ere. Gainera, jan-edana izan dute itxaronaldi motza ahalik eta laburrena izateko. 12:30ean herriko plazan ume, heldu zein nagusiak Arta-Nagusi dantza taldearen dantza ikuskizunaz gozatzeko bildu dira. Txalo eta animo artean hartu dituzte herritarrek dantzariak. Adin guztietakoek parte hartu dute, eta taldeka zein denek batera egin dituzte dantzak. Herriko txikienak izan dira helduen miresmenik handiena jaso dutenak.
IKUSI ARGAZKI GALERIA ZUZENEAN
Amorotarrak plazan elkartuko dira berriro 20:00etan, hori izango da eguneko toki nagusia gaurkoan. Txan Txun Txunen igoera egingo dute eta txupinazoa jaurtiko dute. Gauean, berriz, herritarrei inguruetako herrietako bizilagunak gehituko zaizkie. Musika izango da protagonista, lehendabizi Andoni Ollokiegi igoko da oholtzara eta bere atzetik Zopilotes Txirriaos taldearen doinu mexikarrak eta DJ Bullegaz luzatuko dute gaua. Jai giroaz gozatzeko 21:30ean eta 22:30ean Lekeitiotik autobusak aterako dira eta 04:00etan eta 06:30ean itzuliko dira.
Egitaraua:
Uztailak 4, San Martin eguna
- 11:30. Meza nagusia.
- Ondoren. Dantza ikuskizuna Arta-Nagusiren eskutik.
- 20:00. Txan Txun Txunen igoera eta txupinazoa.
- Ondoren. Andoni Ollokiegi, plazan.
- 22:30. Zopilotes Txirriaos eta DJ Bull, plazan.
Uztailak 5
- 12:00. Hildakoen aldeko meza.
- Ondoren. Txikiteoa, Naiara eta Izarra trikitilariek alaituta.
- 14:30. Hirugarren adinekoen bazkaria.
- 18:00. Umeentzako jolasak.
- Amaitzean. Txokolatada, guraso elkartearen eskutik.
Uztailak 6
- 18:00. Mus eta briska txapelketa, frontoian.
- 20:30. Pintxo potea, plazako txosnan.
Uztailak 7
- 17:30. Krono igoera.
- 22:30. Kontzertuak, frontoian: Itziarren Semeak, Xiberoots eta Kaleko Urdangak.
- 02:30. Muxutruk erromeria, plazan.
Uztailak 8, Herritarren eguna
- 12:30. Kuadrillen arteko paella txapelketa.
- 14:30. Paellen aurkezpena.
- 15:00. Kuadrillen bazkari herrikoia.
- 17:30. Galdera jokoa.
- 19:00. Bertso triki poteoa. Iker Zubeldia eta Iban Urdangarin bertsolariak eta Gari eta Iñaki trikitilariekin.
- 22:00. Bide batez erromeria, plazan.
- Ondoren. Malakias. Atzetik. DJ Ramix.
