Egitarau “indartsuagaz” dator Markina-Xemeingo V. Jazz jaialdia
Uztailaren 20, 21 eta 22an ospatuko dute bosgarren urteurrena Uhagon Kulturgunean. “Erantzun bikaina izan du orain arteko lau urteetan eta aurten ere hala izatea espero dugu”, adierazi dute
Lea-Artibai eskualdeko jazz jaialdi bakarra da Markina-Xemeingoa, aurtengoa bosgarren urtea da eta horretarako hiru egunetan lau kontzertu antolatu ditu Uhagon Kulturguneak udalaren laguntzagaz. “Erantzun bikaina izan du orain arteko lau urteetan eta aurten ere hala izatea espero dugu”, adierazi dute antolatzaileak. Nabarmendu dute taldeen “kalitateaz” gain, A Contra Blues, Big Mama Montse eta Los Saxos del Averno taldeek aurtengo udan Euskal Herrian emango duten kontzertu bakarrak izango direla.
Kontzertu guztiak Uhagon Kulturguneko terrazan izango dira. Euria egiten badu, uztailaren 20 eta 21ekoak kulturgunean barruan izango dira eta hilaren 22koak, plazabarripean, frontoi txikiaren ondoan. 19:30etan hasiko dira kontzertu denak eta doan izango dira. Egitarau “indartsua” antolatu dute.
Uztailaren 20an A Contra Blues taldeak emango dio hasiera Markina-Xemeingo V. Jazz jaialdiari. Boskote kataluniarra Europako rock-blues talde garrantzitsuenen artean dago. Hainbat sari eskuratu dituzte, besteak beste, European Blues Challenge ospetsua 2014an, adibidez. 15 urteko etenik gabeko ibilbidea dute eta zazpi disko publikatu dituzte. “Zuzeneko benetan indartsua eskaintzen dute. Hain zuzen ere, taldearen 15. urteurrena ospatzeko biran dabiltza eta Markina-Xemeingoa izango da bira horren baitan Euskal Herrian uda honetan emango duten kontzertu bakarra”.
Markina-Xemeingo V. Jazz jaialdiari “luxuzko amaiera” izango da
Uztailaren 21ean Irati Bilbao izango da protagonista. Begin abeslari bizkaitarraren lehen proiektu pertsonala da, konposaketa eta moldaketa pertsonalez josia dago”. Bilbaok Musikene Euskal Herriko Goi Mailako Musika Ikastetxean kide izandako lau musikarirekin batera sortu ditu abestiak. “Jazzaren oinarri tradizionaletatik abiatuz musika honen proposamen garaikideetaraino hurbiltzen den proiektua da, zenbaitetan pop edo beste musika estilo batzuekin loturak ezarriz baita”.
Zapatuan [uztailak 22], berriz, egun handi bezala, bi kontzertu antolatu dituzte. 19:30ean Big Mama Montse 35 years & Captain`s Brotherhood igoko dira oholtzara. Montserrat Pratdesaba blues eszenan erreferente nagusietako bat da. Urteurrena ospatzeko kontzertu “berezi” batzuk antolatu dituela esan dute, “batez ere abesti propioekin osatutako errepertorio batekin” eta Hernan Fridman eta Lorenzo Epinozzi (Captain’s Brotherhood) musikarien laguntza izango du. 21:00etan Los Saxos del Averno taldearen txanda izango da. Seikote “berezi, indartsu eta alaia” dela azpimarratu dute, kalitate eta ibilbide “izugarriko” musikariz osatua. “60. hamarkadako rithm&blues erritmoak oinarrian hartuta euren doinuekin dantzarako eta alaitasuerako giroa sortzen dute. Musika ona eta dibertsioa, barra barra”. Markina-Xemeingo V. Jazz jaialdiari “luxuzko amaiera” izango da.
