Korrika egiten hasiko dituzte markina-xemeindarrek Karmen jaiak
Zapatuan [uztailak 8] XIII. Duatloi Txikia eta krosa lehiatuko dute adin guztietako korrikalariek.
Karmen jaietako gehiegikeriak baino lehen, markina-xemeindarrek korrika egingo dute, adin guztietakoek gainera. Zapatuan [uztailak 8] elkartuko dira denak ala denak Zelaian, goizez zein arratsaldez.
Lehenengo, zapatuan [uztailak 8] 11:00etan XIII. Duatloi Txikia antolatu du Alarabi Triatloi taldeak. Orain arte 50 txikik eman dute izena, baina 70-80ra heltzea espero dute. Bost multzo osatu dituzte adinaren arabera banatuta, bakoitzak eginkizun batzuk izango ditu. LH1 eta LH2ko umeek 250 metro egingo dituzte korrikan, gero 325 bizikletan eta amaitzeko beste 250 korrika. LH3 eta LH4koak, 250 metroko ibilbideagaz hasiko dira, bizikletan 650 egiteko eta, ondoren, beste 250 korrika. LH5 eta 6koek, ostera, 325 metroko korrikaldia egingo dute probaren hasieran eta amaieran; tartean, 800 metroko txirrindularitza trantsizioa. DBH1 eta 2ko ikasleek 500 metroko korrika saioa eta 1.600eko txirrindularitza sektorea izango dute. Azkenik, DBH 3 eta 4. mailakoek 650 metro izango dituzte korrika hasieran; ondoren, 2.400 bizikletaz; amaitzeko, aldiz, 500 metro, berriz ere, korrika.
Arratsaldean, karmenetako krosean elkartuko dira herritarrak. Orain arte 40 pertsonak eman dute izena, baina antolatzaileek 100 pertsona inguru heltzea aurreikusten dute, ikusita iaz egunean bertan 50 korrikalarik eman zutela izena. Beste horrenbeste izango dira zapatuan [uztailak 8] Zelaian, 16:30 eta 17:40 bitartean, izena emango dutenak. Krosa 18:00etan hasiko da Zelaitik eta parte hartzaileek hurrengo ibilbideari bi itzuli eman beharko dizkiete, hau da, guztira 7,8 kilometro: Zelaia, Xemeingo eliza, Arretxinaga, Barroeta, zubia, Bekobenta, bidegorria, kiroldegia eta udaletxea Zelaira itzuli aurretik.
Sariei dagokionez, neskentzako, mutilentzako eta mixtoentzako egongo dira. Sailkapen orokorrean, irabazleak txapela, oroigarria eta 50 euro eramango ditu etxera, bigarrenak oroigarria eta 30 euro eta hirugarrenak oroigarria eta 20 euro. Horrez gain, herritarren artean lehen hiru sailkatuek oroigarri bana irabaziko dituzte.
