Posta bidezko botoen igoera hautesmahaietan igarri da
Aurrera doa Espainiako Gorteetarako hauteskunde eguna. Udara bete-betean eta askoren opor egunak izanda, hauteslekuetan igarri da askok posta bidez eman dutela botoa; hautesmahai askotan maiatzeko udal eta foru hauteskundeetako posta bidezko botoak bikoiztu egin dira.
Posta bidezko 249.723 boto daude Hego Euskal Herriko lau lurraldeetan. Herriz herri eta lurraldez lurralde nabaritu da hori. Bizkaian 464.763 pertsonak eman dute botoa, erroldaren %53,39k (%5,38 gutxiago), Araban 120.372 %48,03k (%7,07 gutxiago), Gipuzkoan 287.943 pertsonak, %52,82k (%3,99 gutxiago) eta Nafarroan 249.309 boto emailek gauzatu dute botoa emateko eskubidea, %51,72k (%4,74 gutxiago).
Ohi legez, goiz partean, bereziki eguerdian eman dute botoa herritar gehienek. Arratsaldean, tantaka-tantaka joan dira bozkatzera. Ondarroan Institutuko hauteslekuetan ibili da jenderik gehien –lau hautesmahai daude bertan–. Lasaiago ibili dira Udal Erakusketa Aretoan. Bertan eman du botoa Maria Dolores Etxano EAJren Senaturako Bizkaiko hautagaiak. 11:00etarako bozkatu du. Lekeitioko Kultur Etxeko Eskolapeko aretoan bozkatu du Idoia Sagastizabal EAJren Kongresurako bigarren hautagaiak. 15:00ak aldera eman du botoa, eta herritarrei botoa emateko deia egin die: Gaur, denok bozkatzera!”. EH Bilduko ordezkariek ere botoa ematera animatu dituzte herritarrak, jokoan asko dagoela nabarmenduta: “Euskal herritarrok berriro ere autoritarismoari bidea itxiko diogu”.
