ESPAINIAKO GORTEETARAKO HAUTESKUNDEAK

8.043 botogaz, EH Bildu nagusitu da Lea-Artibai eta Mutrikun

EAJ izan da bigarren alderdi bozkatuena; koalizio abertzaleak baino 2.358 boto gutxiago eskuratu dituzte jeltzaleek, 5.685 guztira. 2019ko azarotik 809 boto gehitu ditu koalizio abertzaleak eta 1.287 boto galdu dituzte jeltzaleek. Abstentzioari dagokionez, %31,91koa izan da, 2019koa baino %7,66 handiagoa.

Larraitz Ibaibarriaga Etxaburu

Lea-Artibai eta Mutriku

2023/07/23

EH Bilduk 8.043 herritarren konfiantza eskuratu du Espainiako Gorteetan ordezkatuak izateko. Bigarren alderdirik bozkatuena EAJ izan da, 5.685 botogaz. Orain dela lau urteko emaitzak errepikatu badira ere, nabarmen gora egin dute EH Bilduren boto emaileek (809 boto irabazi dituzte) eta behera egin dute jeltzaleenek, 1.287 boto galduz.

1.074 boto lortu ditu PSE-Eek, duela lau urte baino 404 boto gehiago. Lea-Artibai eta Mutriku osatzen duten hamairu herrietatik Amoroton izan ezik gora egin dute boto kopuruek, batez ere Lekeition eta Markina-Xemeinen: 2019an baino 102 eta 54 boto gehiagogaz, hurrenez hurren.

Abstentzioak %7,66ko gorakada eduki du, 2019ko azaroko hauteskundeekin alderatuta. Munitibarren %40,88koa izan da abstentzioa, eskualdeko handiena izan da (2019an %37koa izan zen, hori ere eskualdeko altuena). Ispasterren boto eskubidea zutenen ia %80 joan da bozkatzera (2019an ia %77ak eman zuen bozka). Abstentzio baxuena izan duen udalerria da.

Boto zuriak 64 izan dira, 2019an baino 23 gutxiago. Ondarroak izan du gorakada handiena, duela lau urte baino 20 boto zuri gehiagogaz. Boto baliogabeak, aldiz, 11 gehiago izan dira, eta ia herri guztietan izan du gorakada, nabarmenena Lekeition, 15 boto baliogabe gehiagogaz, eta Markina-Xemeinen, Ondarroan eta Mutrikun 9 gehiagogaz.

espainiako gorteetarako hauteskundeak hitza u23 lea-artibai mutriku

Erlazionatutako edukiaEGUNEKO KRONIKA: Posta bidezko botoen igoera hautesmahaietan igarri da