Kirola eginez ospatuko dituzte Aitxe Kutz jaiak berriatuarrek
Umeentzako jolasekin hasiko dute jai eguna, izan ere, duatloia egingo dute herriko gaztetxoenek.
Berriatuko bizilagunentzako jai egun handia da biharkoa: Aitxe Kutz eguna. Eguna bihar bada ere, berriatuarrak zapatuan bilduko dira eguna ospatzeko, eta kirola eta festa uztartuz egingo dute hori.
Udazkena badatorrela adierazten duten egunak dira hauek, udako egunei agur esatekoak, eta horretarako egitarau oparoa prestatu dute Berriatuan.
Umeentzako jolasekin hasiko dute jai eguna, izan ere, duatloia egingo dute herriko gaztetxoenek, eta aringa-aringa zein bizikletaz ibiltzeko aukera izango dute. Duatloian parte hartzeaz gain, herri kirolak probatzeko aukera ere izango dute.
Izerdia botata, herri bazkarian batuko dira herritarrak Arriola jatetxean. Kalean bazkaldu gura duenak hori egiteko aukera izango du, baina mahaiak eta aulkiak udaletxean eskatu beharko dituzte aurretiaz.
Arratsaldean, berriz, iazko legez, herritarren arteko bizikleta desafioan elkartuko dira berriatuarrak. behin desafioa amaituta, sari ederraz gozatuko dute: parrilladan elkartuko baitira. Egonaldia Izarra eta Mirari trikitilariek girotuko dute.
Zapatua, irailak 16
11:00. Umeentzako jolasak: Duatloia (aringaringa eta bizikleta) eta herri kirolak.
13:00. Herritarren arteko herri kirolak eta lasto jaurtiketa, Tubiren eskutik.
14:30. Bazkaria Arriola jatetxean. Kalean bazkaldu gura duenak udaletxean eskatu beharko ditu mahaiak eta aulkiak.
16:00. Ur jolasak.
17:00. Herritarren arteko bizikleta desafioa: kostari buelta.
20:00. Parrillada.
Iluntzean. Izarra eta Mirari trikitilariak.
