Euskal ikus-entzunezkoen erakusleiho izango da beste behin 46. Euskal Zine Bilera
Lekeitioko zinema jaialdiak Elena Irurerari eta Ane Gabaraini emango dio Euskal Zinemaren Begirada saria. Urriaren 19tik 22ra ospatuko da jaialdia, Ikusgarri zinema aretoan.
Jarraitu zinearen lorratza leloagaz dator aurten, urriaren 19tik 22ra ospatuko den 46. Euskal Zine Bilera. Martitzen [urriak 10] arratsaldean egin zuten aurkezpena eta jaialdiaren berrikuntzak eta aurtengo ildo nagusiak azaldu zituzten. Hain zuzen ere, atzera eta aurrera begira jarri dira antolatzaileak. “Etorkizunera begira egotea bezain garrantzitsua da, noizbehinka, atzera begiratzea, eta bidea egin duten pausoetara erreparatzea. Aurtengo Euskal Zine Bilerak bere ibilbidean zehar izandako lorratzak jarraitu nahi ditu eta etorkizunekoak sortu”.
Horren isla dira aurkezpenean parte hartu zuten eta kartel ofizialaren protagonista diren Jose Luis de la Torre eta Gentzane Agirre. De la Torrek jaialdiaren hastapenak gogoratu zituen aurkezpenean. “Zinema zaharraren inguruan elkartzen ginen, eta filmak proiektatu eta gero sariak ematen genituen”. Agirrek Euskal Zine Bilera euskara hutsezko jaialdi bakarra dela nabarmendu zuen: “Euskara bakarrik ez, euskal kultura ere erakusten da Lekeition”. Biak ala biak bat etorri ziren jaialdia “herritik eta herritarrek” sortutakoa dela eta duela lau hamarkadatik Lekeitio euskarazko ikus-entzunezkoen “topalekua” dela esaterakoan. Horregatik, 46. Zine Bilerak jaialdiak ondare gisa duen balioa goraipatu nahi du.
Proiekzioak, solasaldiak edota hitzaldiak antolatu dituzte, baina beste urte batez jaialdiaren “bihotza” Sail Ofizialeko Lehiaketa izango da
Bigarren urtez jarraian, lau eguneko iraupena izango du. Proiekzioak, solasaldiak edota hitzaldiak antolatu dituzte, baina beste urte batez jaialdiaren “bihotza” Sail Ofizialeko Lehiaketa izango da. Hemeretzi filmek lehiatuko dute Urrezko Antzarragatik. Xabier Arrate koordinatzaileak esan du “denetariko lanak” aurkeztu direla dokumentaletatik animaziora arte, fikziotik pasata. Horrez gain, nabarmendu dute “Euskal Herriko txoko guztietako lanak” proiektatuko dituztela. Hori gutxi ez, eta egileak “anitzak” direla, gazteak zein beteranoak. Horrez gain, lehiaketatik kanpo, Mari Luz Esteban antropologak idatzitako Andrezaharren manifestua testuagaz egindako lana proiektatuko dute. Gero, Estebanegaz solasaldia antolatu dute.
Jose Luis de la Torre eta Gentzane Agirre.
Lehiaketako epaimahaia hiru kidek osatuko dute: Nerea Alberdi konpositorea, orkestratzailea eta moldatzaileak; Ramon Agirre ibilbide luzea duen euskal aktoreak, eta Alaitz Arenaza Zinegoak jaialdiko egungo zuzendari artistikoak. Hiru hauen artean, hainbat sari banatuko dituzte: Film onenaren saria: 3.000 euro; Zuzendaritza onenaren saria: 1.600 euro; Gidoi onenaren saria: 1.600 euro; Ikusleen saria: 750 euro; Gazte 22 saria (2001. urtetik aurrera jaiotakoentzat): 750 euro. Arratek nabarmendu du epaimahaia “esperientzia handikoa eta anitza” dela. Sari banaketa urriaren 21ean 19:30etik aurrera egingo Ana Goitiak eta Jon Garatek zuzenduta.
IKUSI ARGAZKI GALERIA ZUZENEAN
Baina protagonista nagusienetako bi Ane Gabarain eta eta Elena Irureta izango dira. Euskal Zine Bilerak urtero jartzen du bere begirada euskal ikus-entzunezkoen alorrean ekarpen berezia egin duen eragile edo pertsona batengan. Lehen aldiz bi pertsonak, bi emakumek kasu honetan, jasoko dute Euskal Zinemaren Begirada saria. Antolatzaileek bi aktoreen bideak berriz gurutzatu nahi izan dituzte eta “merezi duten aitortza” eman: “Euskal zein Euskal Herritik kanpoko iruditegian lekua egin duten aktoreak dira”.
Berritasunak. Hain zuzen ere, berritasunekin eta ezustekoekin dator Lekeitioko 46. zinema jaialdia. Esate baterako, garaikur berria estreinatuko dute aurten. Zinemagintzaz gain, “artearen esparru desberdinetara” zabaldu nahi dute jaialdia. Horregatik, garaikurra berritzeko deialdia zabaldu zuten duela hilabete batzuk, eta Sahatsa Jauregirena aukeratu dute. “Ezezaguna eta ezagunaren, hurbilekoa eta urrunekoaren arteko harremanean oinarritutako pieza bat da”, azaldu dute. Gaurtik aurrera euskal artistek diseinatuko dute, eta hiru urterik behin aldatuko dute, beste sortzaileei tartea eginez.
Horrez gain, Euskal Zine Bilerako ZOOM atalaren barrun eta Lekeitioko biztanleei zuzendutako programa pedagogiko bat sortzeko asmoz, Arropaineko Arraguaren Klixka programa abian jarri dute. “Klixka, ikus-entzunezko artxibo baten produkzioaren esparrutik bideratzen da, sorkuntza garaikideko praktiketatik, analogikotik digitalera mugituz, eta alderantziz, ikus-entzunezko praktika eta esperientzia zabaldu eta elikatzeko helburuagaz”. Aurten, Azkue Ikastolako DBH3ko ikasleek eta Iturriotz Institutuko Batxilergoko bigarren mailako ikasleek parte hartu dute, eta artista gonbidatuak Zaloa Ipina, Inaki Rifaterra eta Peru Galbete izan dira. Esperimentazio Espazioa urriaren 21ean egongo da zabalik 12:00etatik 14:0etara eta 17:00etatik 19:00etara, Eskolape aretoan.
Kameratoian 18 eta 26 urte bitarteko zinegile gazteek 36 ordu besterik ez dituzte izango film bat sortu eta aurkezteko
Euskal Zine Bileratik “garrantzitsutzat” jotzen dute elkarlanerako ateak zabaltzea. Aurten, Gasteizko Artium Museoagaz tarte berezi bat partekatuko dute. Pantaila irekia ekimenaren barruan, Zine Elkarrizketak egitasmoa jarri dute martxan. Artium Museoko Z aretoan erakutsitako hiru euskal sortzaileren lanen aukeraketa bat proiektatuko da, eta egileekin elkarrizketa bat egingo da ostean. Ainara Elgoibarren Gold 20, Maddi Barber eta Marina Lameiroren Paraíso eta Irati Gorostidi eta Mirari Echavarriren San Simon 62 filmak ikusi ahalko dira.
Aldatu ez dena Euskaltzaleen Topaguneagaz elkarlanean egiten den Kameratoia da. Bertan 18 eta 26 urte bitarteko zinemagile gazteek 36 ordu besterik ez dituzte izango film bat sortu eta aurkezteko. Aurten, 20.000 especies de abejas filmagatik arrakasta handia lortzen ari den Estibaliz Urresola zuzendaria eta iazko Euskal Zine Bilerako zuzendari onenaren saria irabazi zuen Aitzol Saratxaga zuzendaria izango dira epaileak. Gainera, partaideek soinu masterclass-a izango dute Asier Renteria soinu ekoizlearen eskutik. Izen ematea urriaren 18ra arte egongo da zabalik. Sari banaketa urriaren 22an 16:30ean egingo dute, Ikusgarrin. Ugaitz Alegriak gidatuko du ekitaldia, eta bertan egindako lanen emaitzak proiektatuko dituzte.
