Eskualdeko produktuz bete da Lea-Artibaiko Urriko Azoka Nagusia, Markina-Xemeinen
Gaur [urriak 14] askotariko ekintzak egin ahal izateko aukera izan dute eskualdeko txoko guztietatik etorritako herritarrek. Ez du eguerdira arte euririk egin. Euskadiko 27. Blonda Txapelketa lehiatu da eta Eizmendi baserriko Idoia Esnaola izan da saririk gehienak irabazi dituena.
Lea-Artibaiko Urriko Azoka Nagusia beste urte batez arrakastatsua izan da. Gaur [urriak 14] eskualdeko herrietako bizilagun asko eta asko hurbildu dira Markina-Xemeinera arte produktu onenetaz gozatzera. Hodei beltzek etengabe mehatxatzen bazuten ere, eguerdira arte ez du euririk egin eta giro alaia nagusitu da.
Batez ere lehen orduan eta egurdian elkartu da jende gehien azokan. “Ohi baino lehenago” hasi dira salmentak, euriaren beldur, eta orokorrean salmentak “nahiko onak” izan dira. Zelaia bakarrik ez plazabarripea, plaza eta herriko beste txoko asko ere jendez gainezka egon dira. Azoka guztietan pasa ohi den bezala, taloa jateko ilara luzeak sortu dira. Zigor Iturrietaren showcookingak ere kurioso asko erakarri ditu Zelaira.
Kezka. Baina denak ez dira baserrietako produktuak izan, abereak ikusteko aukera ere egon da Urriko Azoka Nagusian. Euskadiko 27. Blonda Txapelketa lehiatu da, urtez urte txandakatzen dute Markina-Xemeinek eta Azpeitiak. Aurten, berriz, denen ahotan zegoena ez zen irabazlea bata edo bestea bazen, abelburuei eragiten dien Gaixotasun Hemorragiko Epizootikoa izan da.
IKUSI ARGAZKI GALERIA ZUZENEAN
Karmelo Gisasola abeltzainak azaldu du gizakion Koronabirusaren antzeko gaixotasuna dela. Etxebarritarrari orain arte behia bakarra hil bazaio ere, bere inguruko lagunen artean hildako behiak “askoz gehiago” direla esan du. “Lehendabizi artikulazioei eragiten die, asko motelago daude. Gero, ahoan eta eztarrian infekzioak izaten dituzte eta ezin dute behar bezala jan”. Horregatik, kilo asko galtzen dituzte, batzuk hil arte. Ez direnez behar bezala elikatzen, medikamentu “oso indartsuak” jarri behar dizkiete eta urera bitamina desberdinak sartu “indarrik ez galtzeko”.
Azken asteetan “beste bolada handi bat” nabaritu dute abeltzainek. “Birusa udan, uztail inguruan, hasi zen Espainian eta gerora Euskal Herrira arte heldu da”. Azaldu duenez, Eusko Jaurlaritzagaz harremanetan daude abelburuak sendatzeko behar dituzten medikamentuak emateko.
Sari asko. Erosketak egin eta jai giroan murgildu nahi zutenek, gainera, kontsignak eduki dituzte erabilgarri. Eta kontsignen erabiltzaileen artean bertoko produktuen bi otzaren zozketa ere egin dute: Lehen otzaran 80 zenbakia izan da sariduna (ordezkoa 3) eta bigarrenean 87 zenbakia. Eguraldia lagun ez izan arren, giro ona izan da nagusi.
EUSKADIKO 27. BLONDA TXAPELKETA
- 5 urtetik gorako behiak txahalik gabe ‘B’: Eizmendi baserriko Idoia Esnaolaren Laia behia. Sari emailea: Esti Arruti Osa Ondarroako Udaleko zinegotzia.
- 5 urtetik gorako behiak txahalik gabe ‘A’: Eizmendi baserriko Idoia Esnaolaren Nekane behia. Sari emailea: Jesus Lekerikabeaskoa Arrillaga Ispasterko Udaleko zinegotzia.
- 5 urtetik gorako behiak txahalarekin: Longa baserriko Jose Angel Zendoiaren Odry behia. Sari emailea: Irati Urberuaga Aranguena Aulestiko alkatea.
- 4 eta 5 urte arteko behiak txahalik gabe: Eizmendi baserriko Idoia Esnaolaren Paloma. Sari emailea: Joseba Goienola Bilbao Berriatuko alkatea.
- 3 eta 5 urte arteko behiak txahalarekin: Eizmendi baserriko Idoia Esnaolaren Pili behia. Sari emailea: Amaia Zabala Gizaburuagako alkatea.
- 3 eta 4 urte arteko behiak txahalik gabe: Makurreta baserriko Iturbe anaien Ritu behia. Sari emailea: Jesus Iriondo Lejardi Etxebarriko alkatea.
- 24 eta 36 hilabete bitarteko urruxak: Longa baserriko Jose Angel Zendoiaren Saioa behia. Sari emailea: Iratxe Lasa Markina-Xemeingo alkatea.
- 18 eta 24 hilabete bitarteko urruxak: Eizmendi baserriko Idoia Esnaolaren Tania behia. Sari emailea: nerea Urritibeaskoa Aldakogarai Lea-Artibaiko Landa Garapena Alkarteko zuzendaria.
- 12 eta 18 hilabete bitarteko urruxak: Longa baserriko Jose Angel Zendoiaren Teixa behia. Sari emailea: Andoni Agirrebeitia Abendibar Bizkaiko Foru Aldundiko Nekazaritzako zuzendaria.
- 7 eta 12 hilabete bitarteko urruxak: Illaispe baserriko Ismael Arriolaren Uxue behia. Sari emailea: Arantza Atutxa Lejarreta Ingurune Naturala eta Nekazaritza Sususatzeko Saileko Foru Diputatua.
ERAKUSMAHAIETAKO SARIAK:
- Ortuarien Mahairik Onena: Xemeingain.
- Azokako Mahairik Onena: Baskaran.
-
