LABek salatu du Ondarroan arrantzale bat hilik agertu dela eta administrazioak ez duela dagokion "erantzukizuna bere gain hartu nahi"
66 urteko gizonezkoa Euskal Herrian lan istripuz zendutako 47. langilea da, eta itsasotik lehorrerako sartu-irten batean uretara erori da. Osalanek eta Lan Ikuskaritzak ez dute lan-heriotzatzat jo gertatutakoa, behargina “atseden egunetan” zegoela argudiatuta.
Lekukoek sindikatuari adierazi diotenez, 66 urteko arrantzaleak Galiziako Corvo itsasontzian egiten zuen lan. Itsasontziak hainbat egun zeramatzan Ondarroako portuan, eta arrantzaleak bertan bizitzen egon dira beraien atseden egunetan. Hain zuzen ere, behargina itsasontzitik lehorrera atera eta sartze horietako batean uretara erori da. Hainbat ordu beranduago bere hilotza topatu dute uretan.
LABek salatu du denbora daramala arrantzaleen “bizi eta lan baldintza prekarioak salatu eta hauek duintzeko borrokatzen”. Arrantza jardunaren ezaugarriak tarteko, arrantzaleak “behartuta” daude porturatutako herrian atseden denboran bizitzeko lekua topatzera. Baina esan dute “baliabide eta laguntza mugatuak” dituztela horretarako eta, gehienetan, atseden tartean ere, itsasontzian gelditzen dira.
Sindikatutik adierazi dute “zoritxarrez ohikoak” direla horrelako istripuak, eta “sinestezina bada ere” oraindik ez direla existitzen arrantzaleen bizitzak babesteko “beharrezkoak diren pasarelak eta segurtasun neurriak”. Ondarroan, itsasontzietan ere lan segurtasunari lotutako “egokitzapenak lehenbailehen egitea nahitaezkoa” dela esan dute. “Heriotza honek argi uzten du Portu Agintaritzak neurriak hartu behar lituzkeela”.
LABek salatu du Osalanek eta Lan Ikuskaritzak ez dutela lan istriputzat hartu. “Bere lanaren baldintzak behartuta itsasontzian bizi diren arrantzaleek pairatzen dituzten istripuak baldintza horiek eragindakoak dira”. Gaineratu dute patronalak eta administrazioak lanak eragindako istripuak saihesteko neurriak hartu behar dituztela.
“Sektorearen baldintza prekarioak iraultzea da neurri prebentibo garrantzitsuena eta, bide batez, administrazioak ez dezala bere ardura saihestu heriotza hauek lanetik kanpo kokatuz, honela ez baitira sekula ekidingo”.
Aukerarik gabe. Beste alde batetik, sindikatuak jakinarazi du Ondarroan Itsastarren Etxean arrantzaleentzako zeukaten zerbitzua kendu egin dutela jakin dutela egunoetan. Azaldu dutenez, adingabeak artatzeko jarduera pribatizatua ipiniko du bertan Bizkaiko Foru Aldundiak». Sindikatuaren iritziz, «beharrezkoa»da Inoren Kargura Ez Dauden Adingabeen zerbitzua ipintzea, baina aurreikuspenagaz: «Are gehiago Bizkaiko sarea gainezka dagoela jakinda eta egungo baliabideekin kalitatezko zerbitzua ematea oso nekeza dela aintzat hartuta. Plangintza integral baten bidez egin beharko litzateke, ez inprobisazioz eta pribatizazioen bidez».
