Gorriek asmatu egin dute Unin
Lan handia eginda eta euren buruan sinistuta, zortzigarren puntua eskuratu dute Markina-Xemeingo pilota jaialdian Jakak eta Mariezkurrenak. Peña eta Eskiroz maila oso onean aritu dira.
Eskirozek ez dizkio gauzak erraz jarri Mariezkurrenari. Jaka eta Mariezkurrena sailkapenburuan eta faborito modura ailegatu dira gaur (urtarrilak 13) Markina-Xemeingo Uni pilotalekuan jokatu den Eskuz Binakako Txapelketako partidura. Ez dute partida ondo hasi. Deseroso aritu dira, batez ere Jaka aurrean. Albisu ordezkatuz kantxaratu den Eskirozek ez dizkio gauzak erraz jarri Mariezkurrenari, eta partiduko zenbait tantotan bizkarra erakutsi dio behin baino gehiagotan.
Peña oso seguru eta pilota azkar mugituz aritu da. Bi paretak baliatuz eta gantxoz tanto ederrak egin ditu. Jaka kantxatik ateratzea lortu du, indarrez. Ez dio utzi bere jokoa egiten. Aurrelari tolosarra eraginkorra izan da, eta ikusleek txaloz erantzun diote. 0-3, 1-5, 3-9 joan dira urdinak aurretik, lehenengo atsedenaldira 7-12koagaz ailegatu arte.
Atsedenalditik bueltan, Peñak ezin izan du jokoan hainbeste sartu. Gorriek Eskirozengan jarri dute presioa eta lehen tantoetan galdu duten konfiantza berreskuratu dute, euren buruarengan sinistu dute, eta lanean jarraitu dute. 9-14, 13-14, 13-15, 15-15, 16-16…, hamazazpigarren tantoan jarri dira Jaka eta Mariezkurrena aurretik lehenengo aldiz.
Kantxari “neurria” hartuta, ezker gantxoz ez du barkatu aurrelari lizarzarrak azken txanpan (20-16). Txapapera bota du hurrengo pilota (20-17), eta Peñak ez du asmatu ondorengo tantoetan (21-17). Peñak sakez lortu du 19.a; pilotari abiadura emanda, Mariezkurrenak ezin izan du errestoz eroan. Ezker gantxoz errematatuta egin du partiduko azken tantoa Jakak: 22-19koagaz, zortzigarren puntua eskuratu dute gorriek –bederatzitik zortzi partida irabazi dituzte–. Peñak eta Eskirozek bederatzitik hiru partida irabazi dituzte.
Zortzigarren puntua eskuratzeagatik “oso pozik” agertu da Erik Jaka, pozik ez dutelako etsi eta partida aurrera atera ahal izan dutelako: “Lehenengo zatian oso deseroso aritu gara Jon eta biok, ezin jarri ginen frontoian. Egia esan, frontoi zaila da, frontisa oso irregularra, erramintako frontoia izateaz aparte, frontisak berezitasunak dituela uste dut. Niri pertsonalki batez ere zaila egin zait airea bilatzeko orduan; pilotara ez nintzen ondo iristen, ondo iristen nintzenean ez nuen eskuan ondo sartzen edo ez nituen marrak nahi bezala bilatzen. Jonek ere pilota asko ‘jan’ egin ditu, beste batzuk joan egin zaizkio, eta Peñak eta Eskirozek lehen parte oso oso ona egin dute”.
Atsedenaldian argi zeukaten euren ideiari leial izan behar zirela, lanean jarraitu behar zutela eta galdu behar bazuten, ez zela izango lanik egin ez dutelako eta partida “bota” dutelako. “Alde horretatik iruditzen zait bete-betean asmatu dugula. Bigarren partean Jon tantoz tanto nagusitzen joan da, eta iruditzen zait nire partidu bukaera ere ona izan dela”. Â
Zubizarreta-Ugartemendiak eta Senar eta Elizegik zabaldu dute Uniko pilota jaialdia.
Partida estelarraren aurretik, Binakako Serie B Txapelketan ere gorriak izan dira nagusi. Faborito zergatik ziren erakutsi dute Zubizarretak eta Ugartemendiak. Alberdi II.a eta Morgaetxebarriaren ordez, Senar eta Elizegi kantxaratu dira elastiko urdinez. Partida estelarrean modura, urdinak jarri dira aurretik. 0-2. Zubizarreta oso seguru aritu da aurrean, pilotari indarra emanez. 9-5ekotik aurrera, gorriek nagusitasuna erakutsi dute: 12-5ekoagaz joan dira lehen atsedenaldira. Aurrean asmatuta eta atzean gehiago izanda, 22-5ekoagaz amaitu da partida.
Profesionalekin hitzordua. Abel Calvo Markina-Xemein Esku Pelota taldeko presidentea “pozik” dago urterik urte EPELen Eskuz Binakako Txapelketa Uni frontoira ekartzeagatik. Hasierako helburu beragaz jarraitzen du pilota taldeak: “Esku pilota profesionaleko partidak herrira ekartzeko helburuari eusten diogu. Herritarrek pilotaz gozatzea nahi dugu”. Hasieratik, pilota taldeak kudeatzen du hitzordua, berak erosten du jaialdia. “Helburua da partidu bat ekartzea Markina-Xemeinera eta, behintzat, jarritako dirua berreskuratzea. Hasieratik ondo joan zaigu, enpresek egutegian sartuta daukate eta urtero, gainera, etekina ematen digu. Diru iturri garrantzitsua da pilota eskolarentzat azken urteetan “.Â
Aurtengo jaialdian aurrekoetan baino jende gutxixeago bildu da harmailetan, Sare Herritarrak Bilbon deitutako manifestazioa eta Athletic Club eta Real Sociedaden arteko derbia tarteko. Dena dela, jende askok gozatu du pilotariek eskainitako ikuskizunagaz, Markina-Xemein eta inguruetan dagoen zaletasunaren erakusle.
