Euskal Esnekigileen Elkartea sortu dute sektorea indartu eta kontsumoa bultzatzeko
Markina-Xemeingo Larruz eta Berriatuko Txikiñena elkarteko parte dira, guztira Bizkai, Araba eta Gipuzkoako 29 ekoizle dira.
Bizkai, Araba eta Gipuzkoako 29 esne ekoizle eta esne eraldatzailek sortu dute Euskal Esnekigileen Elkartea, tartean daude Markina-Xemeingo Larruz eta Berriatuko Txikiñena. Bost ekoizlek sustatutako ekimenetik jaio zen elkartea 2023an. Sektoreko ekoizleekin batzartu, bilerak egin eta eman beharreko pausoak zehaztu zituzten. Orain, hiru abeltzaintza espezieen esneki eta esne mota guztiak ekoizten eta eraldatzen lan egiten duten euskal profesionalak elkartzen ditu lehen aldiz.
Lehendabizikoz bakoitzaren “berezitasun eta izaera babestuz” sektorea biltzen duen elkartea sortu dute. Sektorea indartu eta gizartearen esnekiekiko interesa sustatu nahi dute, “ekoizpenari bultzada emanez eta sektoreak barne hartzen dituen askotariko produktuak gizarteratzen lagunduz”. Orain arte egindako lanaren fruitua biltzeko eta etorkizunera elkarrekin begiratzeko “apustu bateratua” dela esan dute.
Hain zuzen ere, lurraldean esnekiek duten garrantzia azpimarratu dute. “Esnekien aberastasun
hori gure lurraldean ondo errotutako sektore batetik dator: esnea ekoizten duten abeltzainengandik eta esnea eraldatzen duten esnekigileengandik. Euskal landa inguru osoan zehar ardi, behi eta ahuntz esnea ekoizten dira, eta hori eraldatuz, gazta freskoak, urdinak, laktikoak, onduak, pasta bigunak, jogurtak, esne pasteurizatua, gurinak…etab. lortzen dira”.
“Gure eguneroko lanaren emaitza da; produktuaren eskaintza anitza, osasungarria eta bertako dibertsitatea babesteko giltzarria ere badena”
Elkarteko zazpi kideak ardi esnea ekoizten dute, hamabostek behi esnea eta zortzik ahuntz esnea. Hau da, guztira 105 produktutik gora ekoizte dituzte, euskal jatorrikoak betiere. Elkartearen helburuetako bat produktuok kontsumitzaileei zabaltzea da: “Gure eguneroko lanaren emaitza da; produktuaren eskaintza anitza, osasungarria eta bertako dibertsitatea babesteko giltzarria ere badena”. Lehen sektoreak gizarte osoarentzako “onuragarria” den lana egiten duela erakutsi nahi dute.
Aurrera begira. 2024rako helburu nagusi moduan jarri dute sektorearen eta bertakoaren alde egindako lana ezagutzera ematea, “dibertsifikazioa ardatz eta erdigune izanik”. Era berean, erakunde eta kontsumitzaileen aurrean batasuna adierazi nahi dute. Horrez gain, elkarteak sektoreko profesionalen interesen ordezkari eta babesle moduan egingo du lan. Administrazioaren aurrean eta osasun-agintaritza eskudunekin koordinatzeko bitartekaritza eskainiko dute. “Kolektiboaren prestakuntza beharrak kudeatzeko plataforma gisa funtzionatuko du, elkartekideen garapen tekniko zein enpresarialerako baldintzak hobetzeko lan eginez. Sektoreak izan ditzakeen gabeziak antzeman eta denen indarrez bideratu nahi ditugu, funtsean”.
Euskal Esnekigileen Elkartetik gogoratu dute elkartea ateak zabalik dituela beste edozein ekoizlerentzat. Etorkizunean kide izan nahi dutenentzako edo informazio gehiago nahi dutenentzako elkartearen webgunea jarri dute eskuragarri.
