15. Nautika Eguna ospatuko dute Lekeition
Lekeitioko Nautikan entseatzen duten musika taldeak kalera irtengo dira zapatuan [abuztuak 3]. Kalerik kale ibili ostean, kontzertua emango dute Nautika aurrean.
2023ko Nautika Eguna 15 urte dira, pandemia urtekoak kenduta, abuztuko lehenengo zapatuan Lekeitioko musikariek Nautika Eguna ospatzen dutena. Nautikan entseatzen duten taldeek parte hartzen dute egunean, eta aurten Lekitto Musika Banda, Itxaropena Txistu Elkartea, Aittitta Makurra Txaranga, Lekeitioko Estudiantina eta Kantu tailerreko musikariak izango dira herriko kaleak doinuz beteko dituztenak.
Miguel Arrieta Lekeitioko Musika Bandako zuzendari ohiak zuzendari berriari lekukoa pasa zionean hasi ziren Nautika Eguna ospatzen. Nere Jauregik, kantu tailerreko kideak, azaldu duenez: “Zuzendari berriak Nautikan batzen ziren musika talde ezberdinak ezagutzeko asmoarekin, denak batzeko egun bat proposatu zuten, bilera bat egin ordez”. Horrela, urtetik urtera joan da Nautika Eguna gaur egun duen itxura hartzen.
Goizeko 12:00etan irtengo dira bost taldeak kalerik-kale, bakoitzak bere ibilbide propioa eginez. Ordu erdi beranduago, 12:30etan batuko dira berriz Nautika aurrean eta bertan eskainiko dute kontzertua. Arratsaldean ere, oraingoan denak batera, giroa alaitzen ibiliko dira herrian zehar.
