Abuztuarekin batera heldu dira Iruzubietako Jaiak
Egitarau oparoa antolatu dute aurtengoan ere iruzubietarrek. Gaurtik [abuztuak 2] astelehenera [abuztuak 5] arte egongo da jaiez gozatzeko aukera.
Abuztuan bete-betean sartuta, aurrera doaz Lea Artibaiko jaiak. Jai giroan murgiltzeko hurrengo aukera Iruzubietan egongo da, abuztuaren 2tik 5era bitarte, Edurtzako Amaren jaietan.
Jaietako azken kontuak amaitzen dabiltza iruzubietarrak, gaur [abuztuak 2] hasiko baitituzte auzoko jaiak. 16:00etan botako dute txupinazoa eta ondoren Mus Txapelketa egingo dute. Izen ematea gaur [abuztuak 2] bertan izango da txapelketa aurretik.
Zapaturako antolatu dute egitarau nagusia. Goizetik hasiko dute eguna txikiteo herrikoiarekin trikitilariek lagunduta. Bertsozaleek izango dute gogoko ekimenik: bazkalordua Nerea Ibarzabal eta Julio Sotoren bertsoen eskutik etorriko da. Umeek ere “helduek legez jaiez gozatzeko aukera izan dezaten” Zirku Tailerra antolatu dute arratsalde parterako Zirkukoloretsuren eskutik. Iluntze aldera Markina-Xemeingo erraldoiak hurbilduko dira Iruzubietara eta, trikitilarien laguntzaz, kalejira egingo dute auzoan zehar. Astiazarran II eta Andoregi izango dira gauari trikiti eta panderoz musika jartzen arduradunak eta 22.00etan joan den urtean lez, Hiru Txirlo taldeak antolatutako bolo txapelketa egongo da.
Domekan, 11:30ean meza egongo da, eta ostean, Zerutxu Dantza Taldeak emanaldia eskeiniko du. Nahi beste bazkaldu eta lasai egoteko astia egongo da gero, arratsaldean, 18:00etan herri probak hasi arte. Eguna amaitzeko, parrillada egingo dute auzotarrek: “betiko pintxoak prestatu beharrean, parrillada egiten dugu, zerbait desberdina egiteko asmoz”. Parrilladako giroa alaitzen Intxausti eta Larrañaga trikitilariak arituko dira.
Egun handia, Edurtzetako Amaren Eguna, astelehena [abuztuak 5] izango da. Eguerdiko mezaren ostean, txikiteo herrikoia egingo dute. Lagun eta familiartean bazkaldu ostean, 17:00etan mus txapelketa egongo da.
