Arbek Oihenardegaz eta Atainek Bixentegaz jokatuko dute Hondarribiko Grand Slameko finala
Bi markina-xemeindarrak aurrez aurre ariko dira Hondarribiko Grand Slameko finalean, barikuan (irailak 20), 20:00etan.
Arbe Hondarribiako finalaurrekoetan. Argazkia: Guk Jai Alai. Jokin Arbek eta Guillen Oihenardek Bixente Gonzalez eta Gorka Mugartegi Atainen aurka jokatuko dute barikuan (irailak 20), 20:00etan, Hondarribiko Grand Slameko finala. Finalaurreko estuak irabazi ostean lortu dute finalerako txartela batzuek zein besteek, hirugarren setean erabaki baitziren bi finalaurrekoetako garaileak.
Erik Mendizabal mutrikuarrari eta Ruben Bailori hirugarren setean irabazi ostean sailkatu ziren finalera Arbe eta Oihenard, 15-11, 11-15 eta 3-5eko markagailuagaz. Bailo eta Mendizabal ziren faboritoak, baina partidua iraultzea lortu zuten hirugarren setean, lehenengo seta galdu eta gero. Azken tantora arte estu hartu zituzten Mendizabalek eta Bailok, baina talde lanean oinarritutako garaipena izan zela lehia irabaztearen gakoa adierazi dute.
“Nik ez dut partidua ondo hasi, baina talde modura jokatu dugu, eta horregatik irabazi dugula uste dut. Jokinek asko lagundu dit, eta pozik nago”, adierazi du Oihenardek. Arbek, bere aldetik, finalean egoteko hirugarren setean arriskatu egin behar izan zutela onartu du: “Hirugarren setean arriskatu egin dugu. Uste dut bikote oso ona egin dugula, txapelketaren hasieratik amaierara bitartean asko hobetu dugula”.
Bestalde, Bixentek eta Atainek Theo Laborde eta Pierre Etxeberriri irabazita lortu dute finalerako txartela, hauek ere set erabakigarrian: 15-5, 13-15 eta 5-1. Lehenengo seta aise irabazi zuten, hamar puntuko aldea ateraz, baina bigarrena bi tantogatik galdu zuten. Hirugarrenean, berriz, indarrak hartu eta 5-1ekoa jarri zuten.
Atain Hondarribiko finalaurrekoetan. Argazkia: Guk Jai Alai.
Txapelketan zehar izan dituzten akatsak konpontzen ahalegindu direla dio Bixentek, eta hori lortuta lasai aritu direla finalaurrekoan. Hala ere, finalean egon nahi zutenez, hirugarren setean “irabaztera atera” direla onartu du. Atainek, bere aldetik, finalera begira, esan du partiduaren hasieratik amaierara bitartean erregulartasunez jokatzea izango dela irabaztko giltza: “Finalaurrekoa irabaztearren pozik gaude, baina garrantzitsua da finalean maila ona hasieratik amaierara arte mantentzea”.
Gizonen Hondarribia Grand Slamaz gain, emakumeen Master Series zesta punta txapelketaren finala lehiatuko dute barikuan Jostaldi pilotalekuan, eta bertan, Elaia Gogenola eta Maia Goikoetxea berriatuarrak Maite Ortiz de Mendibil arabarra eta Frida Watkins zumaiarraren aurka ariko dira nor baino nor gehiago.
