Berriatuko bizikidetza proiektuko galdetegia online bete daiteke
Argi Begi Elkartearen bidez bideratzen ari dira, eta orain herritarrentzako galdeketa online erantzuteko aukera zabaldu dute.
Berriatuko herria bizikidetza proiektuan mugilduta dago. Horretarako, Berriatuko Udala Argi Begi Elkartearekin jarri zen harremanetan. Azaroan, Berritxu danok einaz lemapean, udalak herriko elkarte eta eragileekin martxan jarritako prozesu parte hartzaileko herri batzarra osatu zuen.
Hain zuzen ere, apiriletik ekainera bitartean herriko elkarteekin egindako bileren hurrengo pausoa izan zen. Gero, herritarrekin egin dituzte elkarrizketak aurrez aurre. Azaldu dutenez, 50 elkarrizketa baino gehiago egin dituzte. Horrez gain, galdetegia udaletxean jarri zuten nahi zuenak bete ahal izateko. Orain, ordea, beste pauso bat eman dute eta galdetegia online betetzeko aukera zabaldu dute.
Proiektuaren bigarren fasea da, otsailera arte zabalik egongo dena. Galdetegian, besteak beste, aisialdiagaz, euskararen egoeraz, espazio publikoaren erabileraz edota udal zerbitzu eta hartu emanez galdetzen diete herritarrei. Beraz, berriatuarrei galdetegia betetzeko deia egin diete udaletik eta aldi berean haien proposamenak eta gomendiak jartzera animatu.
Hirugarren fasean, berriz, jasotako erantzunen analisia eta hausnarketa egingo dute. Azkenik, laugarrenean, Argi Begi elkarteak Berriatuko Udalari aurkeztuko dizkio proiektuaren ondorioak. Martxorako aurreikusten dute bizikidetza proiektua amaitzea, jarraian herrian praktikan jartzen hasi ahal izateko.
