Eskualdeko zirkulazioari konponbidea aurkitu nahian
Elixabete Etxanobe gaur [urtarrilak 20] Joseba Goienola Berriatuko alkateagaz bildu da eta Markina-Xemeingo eta Etxebarriko sahiesbideko lanak bisitatu ditu.
Sahiesbideko obren bisitaBizkaiko Foru Aldundia Elixabete Etxanobe Bizkaiko Ahaldun Nagusia Lea-Artibai bisitatu du gaur [urtarrilak 20]. Bisita eskualdeko “lehiakortasuna indartzeko” hartutako konpromisoaren barruan kokatu dute. Azken helburua “konektibitatea eta lehiakortasuna” indartzea dela esan du, “azpiegiturak hobetzea herritarren eta enpresen onerako izango baita”.
Hain zuzen ere, eskualdeko zirkulazioa izan du hizpide, lehendabizi, Berriatukoa. Joseba Goienola alkateak eta Lea Artibai Fundazioko presidenteak herriaren eta eskualdearen beharrizanen berri eman die ahaldun nagusiari eta Ainara Basurko eta Carlos Alzaga foru diputatuei. Batez ere, Berriatuko zirkulazioa murrizteko aukerak aztertu dituztela azaldu dute. Datuen arabera, gaur egun bataz beste 6.000 auto igarotzen dira herritik egunero. Era berean, Ondarroagaz lotura hobetzeko, saihesbide bat eraikitzeko aukera jarri dute mahai gainean.
Hain zuzen ere, hori da egiten ari direna Markina-Xemein eta Etxebarriaren artean. Sahiesbideko lanak bisitatu ditu ostean Etxanobek Iratxe Lasa eta Jesus Iriondo bi alkateekin batera. “Lehentasuna da zirkulazioa hiriguneetatik ateratzea, baita inguruko industriaguneetako sarbideak hobetzea ere”, adierazi du ahaldun nagusiak.
Basurko, Etxanobe, Goienola eta Alzaga, Berriatuan.Bizkaiko Foru Aldundia
Lanak “erritmo onean” doazela azaldu dute, 2026rako aurreikusten dute lanak amaitzea. 335 metroko tunelaren bi aldeetako ahoetako lanak amaitu ondoren, ikerketa geoteknikoko kanpaina osagarri bat egiten ari direla azaldu dute. Bertan, hainbat zundaketa egin dituzte, horiek izango dira azpiegitura eraikitzeko egin beharreko urratsak zehaztu dituztenak.
Era berean, Etxanobek gaineratu du “bide segurtasuna eta ingurumenaren hobekuntza” ekarriko dituela saihesbideak. Gaur egun 5.568 ibilgailu inguru zeharkatzen dute herria eta Azpiegituretarako eta Lurralde Garapenerako Sailak dituen datuen arabera, errepide berriak ia 3.000 ibilgailutan murriztuko ditu herriguneko zirkulazioa, hau da, %53 gutxiago. “Markina-Xemeinen hiri-berroneratzeko aukera bat izango da, herriari aisialdirako eta herritarren gozamenerako espazio bat itzultzen ari zaiolako”, zehaztu du.
Berrikuntzak
Proiektuak ia-ia kilometro bateko errepide bat zehazten du, BI-633 errepidea BI-2636 errepideagaz lotzen duena. Errepide berriak 25,6 milioi euroko aurrekontua dauka, “ibilgailuen joan-etorri askea ahalbidetuko du, eta ilarak saihestuko dira errepidera sartzeko egongo diren bi biribilguneei esker”.
Gaurko bisitan azaldu den berrikuntzetako bat teknologiagaz lotuta dago; MKZ kontrol-zentroagaz komunikatzeko hasierako proiektua aldatu egin dute. 17 kilometroko mikrozanga bat egitea erabaki dute Gerediagako lotunean saihesbideko errepideraino komunikazio guztia zuntz optikoaren bidez egiteko. Apirilaren amaieratik urrira arte egingo dituzte lanok. Jasangarritasunaren ildotik, airea eta zarata kontrolatzeko hainbat ingurumen gailu jarriko dituztela esan dute. Kalitatezko datuak sortzen laguntzen dute, “errepide bidezko garraioaren inpaktua ezagutzeko eta irtenbide berritzaileak definitzeko”.
